À vintottu anni, issu difensore di u Sporting, serà forse unu di i soli ghjucadori corsi ad avè purtatu e magliette di e trè squadre corse prufessiunale. Dopu à un percorsu ch’ùn era tantu faciule iss’ultimi anni, hè sbarcatu, di ghjugnu scorsu, in Furiani per una scumessa nova. Quella di vultà in u mondu prufessiunale…
Sò pochi, i ghjucadori, d’eri o d’oghje chì anu purtatu e magliette di u Sporting, l’ACA è u GFCA. Yohan Bocognano ne face parte. Di fattu, u so percorsu hè malgratu i so anni (vintottu), abbastanza largu. Primi passi in Bucugnà sin’à nove anni, eppo dece anni à l’ACA franchendu tutte e categurie « naziunale » -cù un passaghju à u Gazelec- ma e piazze sò care è u ghjuvanottu hà pocu tempu per mustrà u so valore. Uni pochi di banchi è una participazione à un giru di cuppa di Francia. Ellu chì vulia zifrà u so primu cuntrattu prufessiunale in biancu è rossu. Finalmente, u zifrerà in…Nîmes, chjamatu da Jean-Michel Cavalli di ghjugnu di u 2009. Dopu à duie staghjone, volta in Aiacciu è sceglie, sta volta u Gazelec per un bellu percorsu. « L’addestratore era Dumenicu Veilex, s’arricorda u difensore, una staghjone maravagliosa cù a cullata in Lega dui è un percorsu tamantu in cuppa di Francia. »
U quartu di finale di cuppa di Francia di fronte à Montpellier
In Timizolu, induve u Gaz riceve in cuppa, Yohan Bocognano porta, d’un bellu stucciu, a so squadra in meza finale di fronte à Montpellier chì serà, pocu tempu dopu, campione di Francia (1-0). « Un mumentu magicu… »
Ma a seguita hè più difficiule. U Gaz compie à l’ultima piazza è l’Aiaccinu si ne và, qualchì tempu in Istres nanzu di pruvà una sperienza in Aizerbagianu (in Baccù). « Ci aghju passatu un annu è mezu, belli ricordi cù uni pochi di macci in Europa League. Aviamu compiu duie volte à a seconda piazza. »
In fine, è dopu à un passaghju cortu in Belgica (Tubize), vole rientre in casa soia. « Tengu à ringrazià i dirigenti di Pruprià d’avè mi accoltu è permessu di ghjucà ch’eru dubbitosu. Vuliu piantà tuttu. »
Un soffiu novu in turchinu
Un annu dopu hè cuntattatu da Bastia Borgu, una squadra ambiziosa per una bella staghjone. Ma decide, à u capu d’un eserciziu, di zifrà à u Sporting…. »Perchè, pocu impreme u so nivellu, u Sporting hè sempre u Sporting. »
È dapoi, si pò dì chè Yohan ritrova un soffiu novu. « Semu favuriti per a piazza in N2, un statutu chì ci tocca à mantene. A scunfitta in Aubagne fù un male per un bè. Ci hà permessu di piglià cuscenza ch’ellu ci vulia à fà sforzi maiò ogni sabbatu per pudè cullà. Semu aspettati da per tuttu. In casa, pudemu cuntà nantu à un publicu strasordinariu. Di fronte à Le Mans, ci hà purtatu versu a vittoria. »
In Bastia, l’Aiaccinu si sente bè. Hà ritruvatu uni pochi di cumpagni di a squadra corsa è u so cugnatu Louis Poggi. È à mezu à iss’ambianza quì, spera di cunnosce, torna una volta, è sta volta in turchinu, u mondu prufessiunale.
Identità
Yohan Bocognano
Natu u 12 di ghjugnu di u 1990 in Aiacciu
1, 85 metru, 77 chilò
Percorsu : SC Bucugnà (1995-1999), ACA (1991-2001), GFCA (2001-2002), ACA (2002-2009, squadre « naziunale », furmazione), Nîmes (L2, 2009-2011, 27 macci), GFCA (Naziunale è L2, 2011-2013, 65 macci 8 realisazione), Istres (L2, 2013-2014, 10 macci), Mulhouse (N, 2013-2014, 11 macci) Inter Baccù (Aizer, 2014-2015, 45 macci, una realisazione), Tubize (Belgica, 2015-2016, 10 macci, una realisazione), Pruprià (D onore, 2016-2017), Bastia Borgu (N2, 2017-2018, 11 macci, una realisazione), SC Bastia (N3, dapoi u 2018).
Postu : difensore
Numaru : 4
Primu macciu in Lega dui : 14 d’aostu di u 2009, Nîmes-Vannes (1-1)
Lega 2 : 60 macci, 4 realisazione
Internaziunale (squadra corsa) : 7 macci
