Dopu à un maccione, mercuri sera in Istanbul, u GFCA, battutu 3-0 a settimana scorsa à u Palatinu, hè passatu vicinu di a qualificazione per l’ottesime di finale di a cuppa d’Auropa. Una vittoria (3-0) ma un’ultima parte persa 15-12 ch’ùn li permette micca di francà issu giru. È, di sicuru, un dispiacè tamantu, quellu di un primu macciu mancatu.
Per ciò chì tocca à e discipline spurtive cullettive, è masimu quelle induve ci vole à scartà, in dui macci, un avversariu, ci vole à esse regulare ghjustapuntu duie volte. Mancà unu di issi dui macci, costa, à spessu, car
u. U GFCA n’hà fattu -per disgrazia- a prova issu mercuri. Battutu senza mai esse veramente entrutu in u so macciu, a settimana scorsa à u Palatinu di fronte à Turchi ch’eranu, elli, prisenti à iss’ appuntamentu auropeu (0-3), ci era pocu, à dilla franca, à sperà in un ritornu chì paria una furmalità per l’avversariu.
Di fattu, u GFCA s’hè messu, sta volta, à u nivellu auropeu. Prisente, ch’ella sia à u serviziu, a recezzione, un muru, dendu à issa partita, u ritimu è a forza mentale ch’impone a cuppa d’Auropa, hà resu, d’una certa manera, a muneta à i Turchi. Resultatu, una bella vittoria 3-0 (25-21, 25-21, 25-20) ma l’obligazione, per francà issu giru di passà per u « Golden Set » chè l’Aiaccini avianu ottenutu a parità (0-3, 3-0). È quì, l’hè mancatu pocu per firmà qualcosa di tamantu è forse, sculpisce issa vittoria in a storia rossa è turchina. In fine, sò i Turchi, ch’anu vintu issa parte decisiva (15-12) è chì ghjocheranu l’ottesime di finale. U GFCA, hà, per contu soiu, vintu a partita (3-1) ma pò esse dilusu ch’ellu passatu à cantu à qualcosa di strasordinariu. Un scenariu crudele ma ghjè a realità di u sportu….
