Paulu Maria Bartoli, merre di Prupià, accumpagnatu d’u so cunsigliu municipale, hà prisentatu, l’ottu di dicembre scorsu, u ginnasu novu di a cità. Una struttura dedicata, à tempu, à i sculari, culleghjani è liceani prupianinchi ma dinò allargata per via di l’intercumunalità, à u Sartinese, Valinvu è ancu u Taravu. Un arnese spurtivu impurtante per i ghjovani…![0[2]](https://www.corse-sport.corsica/file/2018/12/02-1.jpg)
Basket, Volley, Hand Ball, Arti marziali, Badminton è, di sicuru tutte e discipline liate à a ginnastica, eccu tutti i sporti ch’elli ponu aduprà dapoi l’ottu di dicembre, i zitelli è i ghjovani di Prupià, di u circondu è ancu aldilà, sin’à u Taravu. L’inaugurazione d’issa struttura municipale custruita vicinu à u culleghju Ghjuvanni Nicoli, in u quartieru di a Piaghja hè stata fatta da Paulu Maria Bartoli, merre di a cumuna, u so cunsigliu municipale in prisenza di Josiane Chevalier, prifetta di Corsica. U ginnasu novu hè apertu à i sculari ma micca solu postu chè l’associ spurtivi ci ponu vene. Una struttura chì hà da favurizà a pratica spurtiva in a cità. Ma chì, aldilà, puderà dà, à più o menu cortu andà, un soffiu novu rinfurzendu ciò chì esiste dighjà: un stadiu di ghjocu à ballò, un tarrenu d’intrenamentu, un stadiu dedicatu à l’atletisimu, una piscina municipale cuperta è una sala di Fitness
