U trail di Samperu in Eccica Suarella

Issa dumenica, u paese d’Eccica Suarella s’hà da mette à l’ora di u trail di Samperu, cù una corsa di dodeci chilometri (750 metri di dislivellu) in giru à u paese è messu in piazza da l’associu « A Suareddesa ». U paese s’impegna ind’una manifestazione chì face…a so strada.

Natu ondeci anni fà da uni pochi di passiunati di corse di muntagna, è dinò per mettene una in piazza d’invernu (ci era a Suarellesa d’estate), u trail di Samperu addunisce, dapoi, più di trè centu participanti tutti l’anni. Un percorsu induve l’abitanti di u paese, quelli chì sò passiunati di i so lochi è di a natura, s’impegnanu ch’ella sia per nettà i chjassi o travaglià intornu à iss’appuntamenti maiò. Issa dumenica (10.00 in piazza à a merria), seranu belli numarosi à parte. Una corsa di dodeci chilometri, cù un dislivellu di 750 metri, in giru à u paese. Cusì, u percorsu passerà da u chjassu di u Sant’Eliseu per andà sin’à Eccica passendu per u ponte à a Vanna è di sicuru, davanti à a stela di Samperu. Dopu avè francatu u chjassu di a Strimedda, i participanti ghjunghjeranu à u casellu è à a Rundina per falà sin’à Eccica è vultà in Suarella. In piazza à a merria, l’urganizatori anu privistu un bellu un bellu spuntinu per tuttu u mondu. Un bellu mumentu di scambii è di spartera dopu à tanti sforzi…