Cù finanze valutate da a DNCG a settimana scorsa, a squadra bastiaccia pò, avà, cunsacrà si à l’aspettu spurtivu. Ind’una cunferenza di stampa data in i scagni di u stadiu, in Furiani, u presidente Ferrandi hà presentatu l’assi maiò di a staghjone à vene. Un budgettu di 3,5 milioni d’auri, una squadra mantenutu in a so maiò parte è ghjucadori ch’anu da vene à rinfurzà u gruppu, i « Turchini » seranu ambiziosi d’aostu. Trè anni dopu à u depositu di bilanciu è a ripresa da una squadra nova, a fasa di custruzzione cuntinueghja a so strada
U trè di ghjugnu scorsu, u Sporting hè passatu davanti à u gendarmu finanziaru di u ghjocu à ballò. È hà vistu u so bugettu (3,5 M) valutatu. Una avanzata maiò per a squadra dirigente nova, è, à tempu, a cunferma chè tuttu và bè à stu nivellu quì. Tandu, è intornu à u presidente Ferrandi, anu pussutu impegnà si à l’aspettu spurtivu. Trè anni dopu à a storia induve hè passatu vicinu di sparisce, u Sporting ripiglia fiatu. A settimana scorsa, i dirigenti anu presentatu l’assi maiò di a staghjone à vene. « U scopu hè di fà per u megliu, spiega Claude Ferrandi, avemu da circà à cumpone u gruppu u più ambiziosu pussibule. Ci hà vulè à fà casu chè stu campiunatu hè sottu à u mondu prufessiunale è abbastanza duru malgratu duie cullate dirette è un play-off. » A maiò parte di u gruppu di l’annu scorsu serà mantenutu, arricchitu da ghjucadori ch’anu da vene à rinfurzà lu per permetteli di tene a strada in Naziunale Una. Cusì, trè anu dighjà datu u so accunsentu: Benjamin Santelli (Chambly) è Dumè Guidi (GFCA) chì voltanu in casa soia. U terzu, Anthony Robic (Laval), purterà a so sperienza (più di 200 macci in prufessiunale). D’altri anu da vene da quì à a ripresa à u principiu di lugliu. U campiunatu, ellu hè privistu per a seconda metà d’aostu…
