Dopu à a cunferma di a so relegazione in Regiunale 2 à a fine di a stagione scorsa, i dirigenti di u RCA anu cuntinuatu à travaglià intornu à i ghjovani. Quarta di a classifica, a squadra una, spera sempre di vultà l’annu chì vene in R1. Ma a priurità di a struttura hè a furmazione…
Senza rimore, u RCA cuntinueghja à fà a so strada. Dopu avè accettatu a sintenza di a relegazione in Regiunale 2, i dirigenti si sò subbitu messu à u travagliu. « Hè statu un mumentu difficiuli, spiega Jérôme Torre, presidente di i « Celu è biancu », ma ùn hè micca in l’usi di u club di lagnà ci. Avemi cuntinuatu à travaglià è possu dì ch’avanzemu à pocu à pocu. » A maiò parte di i ghjucadori di l’annu scorsu anu decisu di stà à d’impegnà si à prò di a squadra una cù l’arrivu di solu dui ghjucadori. « Avemi assai ghjovani in u gruppu, aghjusta u presidente, tenimi u nostru ritimu ind’una cumpetizioni induva avaremu u nosciu rolu à tena. Pensu ch’è noi pudemi vultà in R1 l’annu chì veni, masimu ch’avemi da riceva assai in a seconda parti di u campiunatu. Ma u nosciu onori maiò hè di cuntà 80% di ghjucadori furmati quì in u gruppu. Hè bon segnu… »
Altru puntu pusitivu, e categurie di ghjovani, tutte prisente. « Ghjocani tutti bè, l’ambianza hè bona è i ghustri di zitelli di a scola di rugby in Sarrula è Ventiseri mosciani a saluta di u RCA. » I resultati d’issa dumenicata ne ponu testimunià. A squadra purtata da Jérôme Torre avanza à pocu à pocu ver di u so destinu. Sperendu qualchì bona nutizia da quì à a fine di l’annu…
