L’Aiaccini anu vintu issa dumenica di fronte à La Crau (39-31). Di colpu, i « rossu è turchini » richjappanu, à pocu à pocu u so ritardu nantu à Antibes, capiclassifica. Ma, a scunfitta, per via d’un prublema amminstrativu mentre ch’elli avianu vintu nantu à u terrenu (21-27) u 19 di ghjennaghju scorsu quallà, li stà sempre in a gola ch’anu pigliatu a so piazza. È li dà una forza supplementaria…
U GFCA face a so strada in campiunatu di Naziunale duie. Dopu
à appena di debulezza à a fine di dicembre, (duie scunfitte di fila di fronte à Istres è Aix), l’omi di Yan Basny anu ripigliatu fiatu. Resultatu, quattru vittorie di fila. Ma, gattiva sorte, a vittoria in Antibes u 19 di ghjennaghju scorsu (21-27) hè stata cacciata. Tandu, ghjè a squadra azurra chì hà pigliatu e cummande di a classifica. Per contu soiu è dopu avè marcatu u colpu, u Gazelec s’hè ripigliatu. Una vittoria in Saint-Etienne a settimana scorsa, è un’altra sabbatu, à u Rossini, sta volta di fronte à La Crau. Tandu, si piglia a seconda piazza. « Stu fattu di fronte à Antibes ci hà datu una forza supplementaria, spiega Jean-Luc Pietri, vice presidente di u Gaz, u cullettivu cresce à pocu à pocu è cù a ghjunta di Branca Freitas (Cherbourg, D2), seremu difficiule à batte… » Aspettendu di riceve à Antibes in fine di campiunatu per un « maccione », i « rossi è turchini » anu da pudè rinfiatà duie settimane (cuppa di Francia) nanzu di cuntinuà a so strada u 2 di marzu in Châteauneuf…
