Vitturiosu cù a manera, sabbatu scorsu di fronte à Istres (Lega Una) in sedicesima di finale di a cuppa di Francia, u GFCA cuntinueghja a so strada in issa cumpetizione è dinò in campiunatu induve ùn hà persu ch’una volta dapoi u principiu di a stagione. Segnu chè i Diavuli Rossi marcanu subbitu u so territoriu…
U Rossini era bellu carcu sabbatu scorsu. À l’occasione di e sedicesime di finale di a cuppa di Francia, i Rossi è Turchini avianu lasciatu u Palatinu, per ritruvà a so « Pignatta ». In faccia, a squadra d’Istres (ottesima di prima divisione), benchè senza a maiò parte di i so titulari (l’addestratore avia sceltu di fà girà u so gruppu), ùn hà micca tenutu u ritimu. À l’arrivu, una bella vittoria (37-30) per un gruppu mai in difficultà in sta partita. Segnu ch’ellu hè capace di tene a strada sin’à a fine di a stagione. Un gruppu chì stà, quantunque nantu à ottu vittoria di fila. A so unica scunfitta hè stata u 14 di settembre in Annecy (33-28). Per u restu, tuttu u mondu vene à rompe di fronte à un gruppu ch’ùn lascia chè pisticcine nantu à a so strada. Aspettendu u tir à l’imbusca di l’ottesime di finale, u GFCA, sempre capifila di a classifica, riceve à Chambery (secondu à dui punti) issu sabbatu à u Palatinu. L’occasione di piglià un’avanza inpiù…
