Dopu à duie vittorie di fila in Narbonne è di fronte à Rennes, u GFCA si rimette in a corsa à i « Play-off ».. Ottesimu di a classifica, à dui punti di Nizza, quartu (vintisette punti), ritrova e so virtù. Una bona à una settimana di l’ultima ligna dritta…
Si dicia chè questu annu ùn ci vulia micca à cuntà nantu à u GFCA. Cacciatu fora da e duie cuppe (cuppa di Francia è CEV), mancava è manca forse sempre di regularità dapoi u principiu di a stagione. Capace di u megliu (3-0 di fronte à Tours) è di u peghju (Nizza è Montpellier à u Palatinu), ùn hè mai statu in misura di stallà si cum’è l’anni scorsi, insù di a classifica à l’occasione di a stagione regulare. Ma si sà dinò chè à u Gaz, li piace monda, a fine di campiunatu. Ùn si sà, à dilla franca, ciò chì hà da accade da quì à i play off, à u principiu d’aprile. Ma qualcosa hè sicura. U GFCA ripiglia fiatu ritruvendu u so ghjocu è sopratuttu a forza mentale, necessaria per avanzà. Di fattu, e duie vittorie di fila in Narbonne è di fronte à Rennes (3-0) sò quì per mustrà chè a squadra s ‘hè rimessa in u sensu bonu è à un mumentu induve ùn l’aspettavamu più. Ne saperemu di più dopu à una settimana, forse a più impurtante di a stagione cù trè partite di fronte à Toulouse, Tourcoing è Poitiers. L’occasione di francà u passu aspettatu da tutti i sustenitori « rossi è turchini » è perchè micca di regalà li un finale di quelli/ Primu appuntamentu stu sabbatu in Toulouse
