U Gazelec hà vintu eri sera in Le Mans (2-1) è si piglia un’ozzione per u so mantenimentu. Dopu à un principiu di partita difficiule, hà fattu parlà a so sperienza per marcà à dui mumenti impurtanti è, in modu « guerrieru », tene sin’à fine. Una cunferma hè aspe
ttata dumenica.
Ùn hè chè un primu passu di francatu, è abbastanza bè ma hè vera chè u GFCA, chì per via d’una fine di campiunatu debule, s’era tiratu una balla in u pede è messu una pressione tamanta nantu à u e spalla. Per prova, di fronte à Le Mans, contru à u quale ghjucava u so avvene in Lega duie, ùn partia micca favuritu. Forse li piace issa situazone à a squadra aiaccina.Davanti à guasgi 25000 spettatori, i partenarii di JB PIerazzi anu, certu, suffertu un quartu d’ora cù trè occasione tamante di marcà per i ghjucadori di a Sarthe. Ma stu GFCA quì, appena in modu « guerrieru », ci hà mustratu a so sperienza, a so sulidarità è dinò ciò chì li mancava dapoi quali tempu, u realisimu. Ci hè vulsutu una surtita, a prima, per infurcà u so avversariu. Un bellu ballò di Palmieri è una capata di Blayac per rinfrinscà u MMArena (13a). Tandu, l’affare hè diventata appena più faciule ancu s’è i « sangue è oru » anu messu, torna una volta, a pressione. In secondu tempu, u macciu paria piegatu dopu à una realisazione di Jobello in contru (48a) ma u Gaz s’hè messu a pressione. Un picculu sbagliu di Oberhauser è Boissier chì rilancia a partita (53a). Fermava più d’una meza ora. Ma u GFCA hà pussutu tene cù a grinta ch’è noi li cunniscimu. Tandu l’affare pare bè ingaghjata ma ùn hè ch’una prima parte. Ci hà da vulè à cunfirmà dumenica in Mezzavia.
