A scunfitta di l’Aiaccini in casa soia, a seconda di fila, di fronte à Orléans, vennari scorsu in Mezavia face male. Di sti macci chì vi danu a pen’in capu. Chè u scenariu hè abbastanza crudele per una squadra chì t’hà supranatu u so avversariu i trè quarti di u tempu. Ma, ùn basta. Per vince, ci vole à fà tremà e rete è quì u realisilmu, era inde l’altru campu…
Di capu ind’a conca, u sguardu in terra, certi chì tenianu u capu è chì si dumandavanu ciò chì era accadutu, eccu, di primu colpu, a fine di u macciu GFCA-Orléans, vennari in Mezavia. Una scunfitta, una di più ma quessa quì, ùn hà nulla à chì vede cùn quella di Nancy quindeci ghjorni fà. Di fattu, i sustenitori anu vistu unu di scenarii i più duri di a stagione. Una suprana durante tuttu u primu tempu, trè occasione, una di Gomis cacciata da u purtieru, duie di Blayac (una cacciata da…u pratu) è sopratuttu un fattu di ghjocu chè nimu ùn hà capitu. Gomis chì parte in u spinu di a difesa, solu davanti à Gallon (u purtieru d’Orléans), quellu chì sorte di u so spaziu di penalità è ch’impedisce l’attaccante di u Gaz di trapassà lu. Resultatu, una punizione per u GFCA è una sola cartulina gialla per u purtieru. Quessa a sanzione, hè difficiule à capisce. Ma, passemu…Si ghjoca l’ultime seconde di u primu tempu quandu Ephestion entre in u spaziu di penalità di u Gaz, stuccia cù pocu periculu…Ba chì rimette u ballò nantu à u pettu d’Oberhauser. Quellu, surpresu, ùn pò chè fighjulà Le Tallec chì marca…
U secondu tempu serà più paru ma cùn tempu forte di u Gaz à l’ora di ghjocu. Tandu, Gomis o Armand averanu a parità ma l’anu da manca da pocu. U restu di u macciu, una squadra d’Orléans più tecnica, capace à tene u ballò è à fà corre l’Aiaccini…nanzu di sciaccà ne un secondu da Tell (micca una flezza !) à l’ultima minuta di a partita. Ci sò ghjorni cusì…
