Dopu à un maccione di fronte à Cambrai (3-0), u GFCA hà chjappu u so biglettu per a finale di i play-off. Minacciatu, solu durante una prima parte assai stretta, l’Aiaccini anu supranatu a squadra di u Nordu. L’omi di Fred Ferrandez ghjucheranu mercuri è dumenica di fronte à Cannes, una piazza in Lega A.
U GFCA entre propiu bè in a so partita. Servizii putenti, recezzione prisente, attachi piazzati, ùn tardi micca à piglià e cumande di u macciu (6-3) è, à tempu, di marcà u so territoriu. Ma pian’pianinu, a squadra di u Nordu, chì hè in difficulità à u serviziu, ripiglia fiatu (11-11…13-13…), Ritrova appena di grinta cù un Coulet, chì face male à l’Aiaccini à a passa. Eppo, di manera logica, hè Cambrai chì passa davanti (13-15). Appena debuli à u contru è certe volte à u serviziu, i « rossi è turchini » mostranu ch’elli t’anu risorze tamante. Purtate da Bala è sopratuttu un Lacassie à u nivellu u più altu, riescenu à retablisce a parità dopu avè corsu daretu à a marca sin’à un money-time ch’ùn finiscerà più (20-20, 21-21, 22-22…). A fine di a prima parte hè assai difficlule per i narbi. Purtati da un publicu strasodinariu, l’Aiaccini averanu cinque balle di 1-0 ma, ogni volta, a recezzione, u muru avversu è dinò, li permette, cù certe mancanze aiaccine di stà in u so macciu (24-24….28-28). Finalmente, Un attaccu di Bala è un contru di Weidner, permette à u GFCA di mettesi a prima parte in a so stacca in 31 minute (30-28).
L’Aiaccini cuntenueghjanu nantu à u li stessu ritimu ind’una seconda parte principiata cum’è a prima (4-2…9-7). In difficultà, Cambrai cerca à reagisce ma u Gazelec riesce à cuntà quattru punti d’avanza davanti à u squadra chì pare tocca à u mentale (12-8). Un scartu chè l’Aiaccini ghjunghjenu à mantene (16-12, 17-13…) nanzu di piglià un’avanza decisiva in menu di vinti minute (19-13, 20-14). U GFCA pare prontu per compie a seconda parte ma qualchì debulezza permettenu à Cambrai di crede sempre (20-17, 21-18). Dopu à dui fiachi di fila à u serviziu, Cambrai mette un ghjinochju in terra (23-20). Ind’u ambianza di scemu, Bala dà quattru balle di 2-0 à Gazelec. A prima basterà dopu à un attacci di Lacassie (25-20).
Ferma in a terza parte, à finisce u travagliu. U GFCA mantene u so ritimu ma i Nurdisti ùn sò ancu morti. per prov, piglianu e cummande dopu à un principiu piuttostu in favore di u GFCA (7-9, 8-10). L’Aiaccini ùn mettenu micca a li stessa intensità ch’à l’occasione di e duie prime parte, forse appena di stanchezza fisica. In tutti i casi, Cambrai crede sempre è piglia, cù u so compiapunti argentinu Barrera (14 punti à issu mumentu di u macciu), trè punti d’avanza (10-13). Tandu, u GFCA hè custrettu di corre appressu à a marca (13-15, 14-16, 15-17). Florian Lacassie permette, ogni volta, à l’Aiaccini di stà in u macciu. Ma ci avvicinemu da u money-time. Dopu à un attaccu di Cambrai fora è un fiascu, u GFCA passa davanti (19-18). Cambrai ùn lenta nulla (20-20, 21-21). Eppo Bala face a diferenza. dopu à serviziu d’una putenza scema, dà dui punti d’avanza à i so culori (23-21). Un atttaccu di Villard permette à u Gazelec d’avè duie balle di macciu. Quì dinò a prima basterà. U serviziu di Weidner manda u Gaz in finale!
Sala di u Palatinu
GFCA-Cambrai
1600 spettatori
Arbitri: M Vermende è Crepel
Evoluzione di a marca: 30-28 (31′), 25-20 (26′), 25-22 (28′)
GFCA
Servizii diretti, fiaschi diretti, contri, punti d’attachi.
Sei di partanza: Gill, Bala, Lacassie, Weidner, Roatta, Conré-Libaru: Carreno-add: F. Ferrandez
Cambrai
Servizii diretti, fiaschi diretti, contri, punti d’attachi.
Sei di partanza: Lalisse, Coulet, Pranko, Louis-Marie, Barrera, Villard-Libaru: Grosnon-add: H. Brokking
