Adunita issu marti,
a cummissione di disciplina di a FFF hà esaminatu l’evenimenti chì sò accaduti u dui di ghjugnu scorsu à l’occasione di u macciu GFCA-Le Mans. Resultatu, i Diavuli Rossi ghjuheranu i trè primi macci di a stagione senza u so publicu. U Gaz t’averà, dinò, trè macci attempati.
A sanzione chì seguita l’evenimenti di u dui di ghjugnu scorsu trà u GFCA è Le Mans hè cascata stu marti in i scagni di a cummissione di disciplina di a FFF. Quellu ghjornu quì, quattru ghjurnalisti di a Sarthe eranu stati assaltati da sustenidori aiaccini. À a fine di a partita, i sustenidori avversi eranu stati custretti di falà nantu à u terrenu è di scappà in a sala di stampa dopu à minacci di i sustenidori. Resultati, u Gazelec ghjucherà i so trè primi macci senza i so sustenidori. A squadra aiaccina serà dinò custretta di fà casu ch’ella t’hà trè macci attempati. U GFCA riciverà à Avranches (u 9 d’aostu), Bastia-Borgu (u 23) è Le Puy (u 6 di settembre) ind’un stadiu viotu. U publicu hè aspettatu per a ghjunta di Boulogne, u vinti di settembre. Sperendu chè i rossi è turchini puderanu piglià assai punti in questa perioda
