Dopu à un maccione eri sera à u Palatinu, l’Aiaccini anu vintu u dirittu di ghjucà a so piazza in finale issu vennari à l’occasione d’una terza partita. Cù ciò ch’avemu 
vistu eri, si pò sperà tuttu. Per a prima volta di a so storia, u GFCA ùn hè mai statu cusì vicinu di a so finale…
Servizii pudenti, recezzione guasgi perfetta, muru tamantu, ghjucadori uniti tutti pronti à sfidà a squadra di Chaumont, nimu ùn s’aspittava u Gazelec à un nivellu cusì altu eri sera à u Palatinu di fronte à una squadra maiò di u Campiunatu. Eppuru l’anu fattu. Unu di quelli maccioni ch’anu da stà sculpiti in a memoria di a squadra aiaccina. In menu d’un’ora, i marosuli rossi è turchini anu fattu piegà i ghjucadori di Chaumont chì si punianu dumandà ciò chì si passava. 2 à 0 (25-16 è 25-17). Ci hè vulsutu, dopu à a pausa, una reazzione di Chaumont per retablisce u nivellu è dà appena d’imbusca à a seguita di a partita. Tandu, i ghjucadori di Hute Marne anu alzatu u so nivellu mentre chè u Gaz calava u soiu è si sò pigliati a terza parte (20-25). Ma ci era un segnu issu macciu quì. Quellu di i sbagli diretti à u serviziu (19 per Chaumont, monda à issu nivellu), un segnu chè issa squadra era appena « di capu ind’aconca » à u nivellu mintale. U GFCA n’hà prufutatu per piglià ne a suprana, vince l’ultima parte (25-20) è u macciu. Dopu à u macciupuntu, alcuna reazzione di gioa tamanta malgratu a vittoria. Solu, u sintimu d’avè fattu u so travagliu. È di stà cuncentratu ver di un altru scopu. Quellu di vince issu vennari per ghjucà in finale marti…Impussibule, ùn hè micca GFCA!
