U GFCA hà datu tuttu ciò ch’ellu t’avia di fronte à Cannes in u primu macciu di a finale di i play-off, issu mercuri sera. Malgratu un maccione, induve hà messu tuttu u so core è a so anima, ùn hà pussutu fà nulla di fronte à una squadra chì hà fattu parlà a so sperienza o e so qualità à mumenti impurtanti di u macciu. U GFCA, chì hà quantunque fattu trimà u so avversaria, anderà in Cannes senza cumplessi dumenica.
Una ambianza strasordinaria, un Palatinu carcu, carcu, un’imbusca tamanta, u GFCA vole entre in a storia, di fronte à i maghi cannesi ch’anu vintu duie volte in a stagione regulare (3-0, 3-1). U Gaz vole rende a muneta è piglià un’uzzione nanzu d’andà quallà dumenica. I primi scambii mostranu tutta a difficultà di l’Aiaccini à rivalizà cù u so avversariu. Servizii putenti, muru infranchevule, recezzione guasgi perfetta, ci vole u GFCA à u so nivellu u più altu per sperà qualcosa in issa partita quì. Ma l’Aiaccini danu qualchì puntu à u serviziu (6 in u primu attu) è Cannes piglia subbitu e cummande (4-7…6-9). U Gaz prova à reagisce cù Lacassie ma Noleto è Jacobsen facenu male à un cullettivu chì t’hà u meritu di resiste (8-10, 9-11, 10-12). Eppuru, i Cannesi mantenenu un ritimu tamantu è u GFCA pò fà pocu affare di fronte à iss’armata quì chì prisenta, ci vole à dilla, poche debulezze. Noleto face parlà a pulvina torna una volta è l’avversarii filanu pian’pianinu versu a prima parte (16-21, 17-22). Ma issu Gazelec t’hà risorze mintale strasordinarie. À 17-23, Riesce à marcà sette punti di fila è retablisce a parità (24-24) dopu avè salvatu duie balle di prima parte. Dui punti di Basic, permettenu à Cannes di piglià si la quantunque in più di 30 minute (24-26).
U GFCA hà ritenutu a lezziò è lasciatu i so cumplessi in i spugliatoghji. Si mette in azzione ind’un principiu di secondu attu (3-1, 4-3…). Cù un serviziu più putente è una recezzione bona, l’Aiacciani sò in u so macciu. Un macciu chì si ghjoca da pocu. Di fattu, i « rossi è turchini » facenu sbagli mentre chè Cannes ùn hà micca bisognu di què per fà valè a so superiurità (5-9). Purtati da u so publicu, l’omi di Fred Ferrandez ùn lentanu nulla è cuntinueghjanu i so sforzi (10-11, 11-13). U Gaz insista è Conré retablisce a parità (15-15). A partita hè di più in più stretta ma ogni volta, Cannes parvene à truvà a soluzione per ripiglià a suprana (16-19). Eppuru, nè u curaghju, nè a grinta ùn mancanu per un Gazelec sempre vivu. Per prova, ripiglia fiatu in u money time per retablisce a parità à 23-23. Megliu, U GFCA s’offre trè balle di parità. Cannes salva e duie prime, Lacassie compie u travagliu d’un bellu attaccu (26-24) in u Palatinu più caldu chè mai.
U maccione di Florian Lacassie
Issa parità face prò à l’Aiaccini, mentre chè Cannes dubbiteghja appena. Ciò chì dà un principiu di terza parte indecisu, à l’imagine di u macciu (4-4, 5-5).. Noleto è Basic portanu, torna una volta, una squadra di Cannes chì ripigla e cummande (7-11). Ci vole dinò u Gazelec à u nivellu per mantene a fiara (12-12). Cannes prufitta d’una debulezza di l’Aiaccini per piglià un avanza decisiva à issu mumentu di u macciu (14-19). Cum’è in a seconda parte, u GFCA hè daretu di cinque punti. Lacassie, autore d’un maccione, sona a rivolta ma Cannes ùn lenta nulla è ghjunghje davanti in u money-time (16-20). E ghjambe aiaccine cumencianu à esse pisie (17-22). I ghjucadori si battenu cum’è morti di fame nantu à ogni ballò è resistenu (18-22). Basic dà quattru balle di 2-1 à Cannes. Basta a prima dopu à un attaccu fora di Lacassie (20-25).
A quarta parte, decisiva per i Cannesi cummencia cum’è a fine di a terza. Mantene u ritimu è cuntinuà à esse prinsente in difesa, eccu u scopu di l’omidi Fred Ferrandez. Cum’è dapoi u primu attu, Cannes, piglia e cummande cù un Jacobsen tremende à a distribuzione. Resultatu, Cannes stà davanti è mantene a pressione (6-8) ma u GFCA GFCA stà in a rota. I Cannesi mettenu u viziu per fà sorte à l’Aiaccini da u so macciu dopu discuzzione cù l’arbitri. Ciò chì permette à l’avversariu di tene a so avanza (13-15…15-17). À issu mumentu quì, u macciu si ghjoca cù picculi detagli. Cum’è issu pacchettu di Lacassie ripigliatu, ùn sapemu cum’è da Weir. Tandu, hè Cannes chì s’avvicina da a vittoria (15-19, 16-20). Dopu à un contru di Biglino, Cannes piglia un vantaghju decisivu (17-22). I « Rossi è Turchini » si battenu sempre ma dopu à un serviziu fora di Cardona fora, Cannes finisce cù un contru vittoriosu di Sala
Sala di u Palatinu
GFCA-Cannes (1-3)
Arbitri: MM. Meunier è Sawrei
Evoluzione di a marca: 24-26 (32′), 26-24 (35′), 20-25 (32′), 18-25 (27′)
1700 spettatori
GFCA
14 sbagli di servizii, 54 punti d’attacchi, 8 contri,5 servizzi diretti
Sei di partanza: Gill (3) Bala (13), Lacassie (cap 17), Conré (18), Weidner (4), Roatta (9)-Liberu: Carreno-Add: F.Ferrandez.
Cannes
15 servizii fiascati, 56 punti d’attacchi, 8 contri, 6 servizii diretti
Sei di partanza: Jacobsen (cap.4), Sala (16), Basic (), Weir (13) , Biglino (4), Noleto (14)-Liberu: Mouiel-Add: R.Cerniotti
