L’urganizatori di u 15u trail di Sampieru, chì s’hà da passà l’ondeci di ferraghju da sopra à Eccica Suarella, sò dighjà impegnati à prò d’una corsa monda aspettata chì marcherà a staghjone di e corse di muntagna…
In qualchì annu, a squadra di a Suareddesa ss’hè fatta a so prumuzione cù un impegnu maiò di i so respunsevuli è d’una parte di l’abitanti di u paese. « Hè un’affare d’amicizia, spiega Luc Vincent Rocchetti, membre di a squadra, assai atleti participeghjanu à tutte e corse, una leia s’hè creata è permette di sviluppà a disciplina è di mantene una certa dinamica. »
Cusì, a squadra di u presidente Jean-Claude Tomei hà appruntatu dighjà a corsa chì s’hà da passà da quì à trè settimane. U percorsu, ùn scambia micca, dodeci chilometri, à u principiu è a fine di u centru di u paese, vicinu à a casa cumuna, cù un dislivellu pusitivu di 750 metri passendu per u ponte à a Vanna è a statula di Samperu. Un chjassu d’altronde adupratu è nettatu da i cacciadori. Issa dumenica serà dedicata à e ricunniscenze per l’atleti. « A maiò parte a cunnoscenu, aghjusta u membre di a squadra, ma ogni volta, ci ponu esse atleti novi. »
E scrizzione sò aperte è guasgi 250 participanti sò aspettati. Una corsa rinumata chì, d’altronde, aprerà a staghjone di e corse di muntagna. Per a squadra di u paese, u trail di Samperu hè a prima di e duie corse urganizata nanzu à a Suareddesa à a fine di lugliu.
