Cuntattu da i Turchi di Trabzonspor chè u mercatu cuntinueghja qualchì ghjornu quallà, u mezu terrenu aiaccinu era annunciatu nantu à a partanza da qualchì media è nantu à e rete suciale. Nantu à u so situ, u club aiaccinu hà precizatu chè u so ghjucadore era sempre « biancu è rossu »…
Bella surpresa aiaccina, revelazione in Lega duie dapoi u principiu di a staghjone, Tim Jabol Folcarelli, ghjuntu di ghjugnu scorsu da u Puy (Naziunale) hè una di e suddisfazione di a squadra « bianca è rossa ». U percorsu (22 macci, 2 realisazione, 3 passe decisive ma sopratuttu a regularità) face di u ghjucadore furmatu in Rennes, unu di i megliu di Lega duie questu annu. Di colpu, i sustenidori aiaccini era assai inchieti à u mumentu di u mercatu masimu cù assai muvimenti. I Turchi di Trabzonspor averianu cuntattatu à l’ACA, ma micca solu…D’altre squadre (Lega Una) anu vulsutu chjappà si a « perla bianca è rossa ». un parlacciu mettia u ghjucadore in partanza. I dirigenti di l’ACA anu rispostu nantu à u so situ: « Dopu à parechji scritti publicati nantu à e rete suciale per ciò chì tocca à u nostru ghjucadore Tim Jabol-Folcarelli, l’AC Aiacciu hè statu, hè vera, cuntattatu da squadre durante u mercatu ma a direzzione spurtiva è quella di u club anu fattu a scelta di tene u so ghjucadore. »Da u so cantu, Yohan Cavalli, u direttore spurtivu di l’ACA hè spiegatu u so parè: « Avemu a vulintà di tene i nostri ghjucadori i megliu è ci avemu da batte per què. A nostra scelta hè stata d’ùn perde à Tim à mezu à a staghjone. Ferma Aiaccinu! »
