U famosu spurtivu isulanu, chì si batte, oghje, dapoi tanti anni contru à u svantagiu, hà riesciutu, a settimana scorsa, una sfida maiò : fà, nuttendu, u giru di Corsica. Guasgi 500 chilometri niente chè per sustene tutti quelli
chì sò tocchi d’una malatia o d’un svantagiu. Un omu strasordinariu…
Guasgi sei ghjorni. Eccu u tempu ch’ellu hà messu Thierry Corbalan, a settimana scorsa, per fà u giru di Corsica…Nuttendu! Un percorsu di 500 chilometri riesciutu c’uni pochi d’ amichi. A l’età di 59 anni, è dopu à un svantagiu maiò (hè smuzzatu d’ i so dui bracci dopu à un accidente di travagliu in u 1988), quellu chì hè cugnumatu « u delfinu corsu », hà riesciutu, sta volta, una sfida ch’ell’avia fiascata qualchì annu fà per colpu di u gattivu tempu. Sabbatu dopu meziornu, eranu più di centu à ricevelu nantu à a marina di Tahiti dopu à un percorsu d’ottanta chilometri à ghjornu cù, in certi lochi (Bunifaziu), tafoni di trè metri. Una sfida maiò chì ci mostra chè tuttu hè pussibile ancu per quelli chì sò svantagiati. È dinò una bella lezziò di vita…Una sfida di più per u « delfinu corsu » chì, di sicuru, n’appronta d’altre…
