Sustenitori corsi : Bastia capitale spurtiva ?

U stadiu Armand Cesari face à pocu pressu 3000 o 4000 parsone ogni macciu in Naziunale trè quandu e duie strutture aiacinne ùn ci ghjunghjenu micca, inseme. Perchè ? Inchiesta…

A sapemu chè i cumenti anu da falà à piulate nantu à e rete suciale. D’un cantu i Bastiacci chì s’anu da scrive in tantu chè « patroni di a Corsica spurtiva » è, da l’altru, l’Aiaccini di l’ACA è u GFCA ch’anu da rimette nantu à a tavula, a famosa rivalità trà Pumonte è Cismonte, ch’ùn s’arresta micca, d’altronde, à u ballò (lingua, cultura, ecc…). U fattu hè chì, oghje, u Sporting addinsce trà 3000 è 4000 parsone in Furiani quandu l’ACA è u GFCA ne mettenu a metà in Lega dui. Què, ghjè un fattu è nimu puderà dì u cuntrariu. È s’è noi aghjustemu a cuppa di Francia, eranu à u principiu di ferraghju, guasgi deci mila in Furiani, un marti sera, di fronte à Caen, diciottesimu di Lega Una.

Una rinumata anziana

Per spiegà stu fattu, ci vularia altru c’un articulu. Pagine sane…Certi anu da dì ch’elli ci sò macci tutti i ghjorni à a televisiò, masimu in Lega dui, d’altri chè l’evoluzione di a sucetà, è dinò a sucetà corsa, face ch’elli ci sò monda passatempi è tandu, l’interessu per u ghjocu à ballò hè secundariu. Ma in Furiani ? Comu hè ch’elli ci sò ogni volta, tutti sti sustenitori ? Trà 3000 è 4000 per un maccu di Naziunale trè. Una parte di a risposta saria, di sicuru, u fattu chè i Bastiacci anu passatu più di trent’anni in prima divisione, guasgi quaranta à u nivellu prufessiunale, aghjustendu, dinò a cuppa di Francia 1981 è a finale di a cuppa UEFA 1978. À un’epica induve ci hè statu un viotu maiò in Aiacciu per ciò chì tocca à l’ACA (1974 à 1998) è u GFCA (cuppa di Francia per u più osinnò trà a D2 è a D3 fora di l’annu 1991-1992, cinquesimu cù un statutu prufessiunale à e porte di a D1…). Oghje, d’una manera spurtiva, l’affare anu scambiatu. L’ACA hà francatu vint’anni di fila in u mondu prufessiunale. U GFCA seguita, à pocu à pocu cù un passaghju in Lega una. Ma, tutti quelli, frà l’Aiaccini, ch’anu campatu l’anni settanta, ottanta, novanta ecc. di u Sporting, anu sempre u core « turchinu ». Si parla quì, di sustenitori veri è sputichi micca di quelli chì trattanu l’Aiaccini di « Gaulois », chì si piglianu per i patroni di a Corsica spurtiva, o chì bulicheghjanu sportu è pulitica. Tandu, tutti iss’accaniti facenu cresce u numaru di sustenitori. À stu fattu pudemu aghjustà u numaru di ghjucadori corsi chì porta altr’affare. Una certi identità. À stu nivellu, pudemu rimarcà quantunque, i sforzi fatti da i dirigenti di l’ACA è u GFCA per furmà u fà ghjucà zitelli d’ind’è noi (una dodecina per e duie squadre…) Eppo, per compie, una bona hè di vede a squadra corsa mantene, nantu à i terreni (ancu s’è no pudiamu sperà d’avè un ghjornu « Corsi di destinu » cum’è Whabi Khazri o à l’epica Tchouki Ben Saada), un certu estru corsu. Un estru da tramandà, oghje, in e tribune…