U secondu derby trà u SCB è l’ACA chì s’hà ghjucà sta sera in Furiani metterà pocu imbusca di supranità regiunale. Si tratta sopra tuttu di trè punti. Una vittoria è i « bianchi è rossi » ponu cullà à a cinquesima piazza. Ma a pressione serà, di sicuru, nantu à e spalle di i ghjucadori bastiacci, custretti di vince per alluntanà si di a fine di a classifica.
Un derby hè sempre un macciu particulare trà duie squadre di listessa cità o listessa regione. Si tratta d’una supranità è a Corsica ùn si scarta micca d’issu sintimu specificu, masimu ind’un isula induve u ghjocu à ballò riprisente monda à u nivellu spurtivu. À chì ne seremu d’issu Bastia-Aiacciu versione 2023-2024, episodiu dui? À dilla franca, pocu per ciò chì tocca à a supranità regiunale. Ci pudemu ramintà chè d’ottbre scorsu, in Timizolu, l’ACA avia compiu una seria di 18 anni senza vince di fronte à u so avversariu.
D’un altru cantu, è l’annu di a cullata in Lega una, u Sporting avia vintu e duie partite (2-0 in Furiani, 1-0 in Timizolu). Questu annu, u percorsu di e duie squadre hè scambiatu appena. Sopra tuttu per u Sporting, in difficultà (duie scunfitte di fila, u scambiamente d’addestratore è una pressione tamanta nantu à spalle postu chè i Turchini ùn anu ch’un picculu puntu d’avanza nantu à Annecy, prima squadra « candidata » à a relegazione. Da u so cantu, vù un pocu megliu per l’ACA, ch’avia vintu di fronte à Concarneau a settimana scorsa (1-0) dopu à duie scunfitte di fila in Troyes (3-1) è Dunkerque (2-0). Una squadra aiaccina chì t’hà a particularità d’esse prima in casa soia cù Angers (25 punti pigliati) è solu 18a fora di Timizolu (8 punti). Un macciu dunque assai impurtante per e duie squadre. Nantu à u panchinu bastiacciu Lilian Laslandes è Michè Moretti aspettendu a numinazione d’un addestratore novu in rimpiazzamentu di Régis Brouard. Un macciu chì s’hà da ghjucà senza in sustenitori aiaccini, chì sò difesi. Ci pudemu aspettà à l’ambianza di i maccioni in Furiani induve 15000 persone sò aspettate. Prima zifulata à 20.45
