A reunione urganizata issu dopu meziornu da u Ring Aiaccinu hà tenutu tutte e so prumesse. Tutte e squadre di l’isula prisente, a famiglia di u pugilatu adunita aldilà di a Corsica, tredeci scontri assai disputati, una fervore maiò è sopratuttu tombula per i Corsi cù tredeci vittorie è trè nanzu à limita. Bravi!
U nobile arte hè statu unuratu issu sabbatu dopu meziornu à u ginnasiu Pasquale Rossini induve u Ring Aiaccinu urganizava, guasgi dui mesi dopu à u BCA di Petru Paoli, una reunione di pugilatu amatore cù tredeci atleti isulani ghjunti da i quattru club (Ring Aiaccinu, Bastiacciu, BCA, Balagna Boxing School) di fronte à atleti ghjunti elli da a regione PACA. À l’arrivu, tredeci vittorie per i Corsi, scontri di qualità à mezu à a presenza d’anziani atleti isulani tutti quì per sustene i soi. Per i so primu cumbattu, Gabriel Remiti (RA) hè statu una di e bone surprese di a ghjurnata. Una magnifica vittoria nanzu à a limita (arrestu da l’arbitru) contru à u Nizzardu Mohamed Mmadi. altru atletu corsu rimarcatu, Marc’Andria Simeoni (Ring Bastiacciu), chì hà pigliatu a suprana contru à u Marsegliese Perrin (nanzu à a limita dinò). In fine, Camille Nakache, ellu dinò di u Ring Aiaccinu hè statu rimarcatu assai. « Una reunione magnifica, si rallegra Tumasgiu Brunelli, presidente di u Ring Aiaccinu, per a prima volta, tombula per l’atleti corsi. U pugilatu hè da veru qualcosa di particulare, ci sò raporti stretti trà tutti, hè una famiglia è tuttu u mondu hè statu unuratu. » S’aspetta avà per l’atleti corsi, i campiunati di Francia ch’anu da principià di marzu prussimu.
