Dopu avè dighjà liatu u so nome à l’AS jardins de l’Empereur Omnisports, u mezu terrenu isulanu hà vulsutu impegnà si cù l’Ulimpicu Alatese, induve u so babbu, Hector, hè presidente. Una bella festa hè stata urganizata, sabbatu 
scorsu, in Barthélémy Silvani induve u ghjucadore hè statu prisentatu à tutti, dirigenti, educatori, merre di a cumuna è zitelli…
Dapoi a so creazione di lugliu scorsu, l’OA (uchjata à a famosa squadra aiaccina) face a so strada. A squadra di i dirigenti, à mezu à anziani ghjucadori è educatori (Antone Battesti, Dumè Compas) s’impegna monda à prò d’un club chì avanza à pocu à pocu. Sabbatu in Barthélémy Silvani, ci era un mondu scemu (più di dui cientu persone) per accoglie cum’ellu si deve, à Rémy Cabella, cumpare di i verdi è bianchi. i Respunsevuli di a merria eranu, elli dinò, in piazza ind’una festa maiò per unurà l’Aiaccinu. In reeducazione in Montpellier dopu à a ferita impurtante (rumpitura di i ligami cruciati di u ghjinoghju) in Olympiakos (macciu qualificativu per a Lega di i Campioni), Rémy Cabella hà passatu a dumenicata à mezu à i soi. È ùn hà mancatu di risponde à l’invitazione di i dirigenti. Ritratti, zifrate, selfies, hà resu felici monda zitelli. Una meza ghjurnata chì s’hè compia intornu à una visparina per i più chjuchi è un bichjeru per i maiò. Per l’Aiaccinu, a cumpetizione ripiglierà da quì à qualchì mese. Averà, di sicuru, l’occasione, di vultà à vede i zitelli di a squadra verde è bianca…
