U calendariu di a Lega una hà privistu parechji macci u cinque di maghju prussimu. Una decisione chì rilancia l’affare di ghjucà o micca u ghjornu anniversariu di u drama di Furiani. Per Ghislain Printant, oghje à Saint-Etienne ma anzianu addestradore di u Sporting, hè chjaru ch’ùn ci vole micca ghjucà…
Tutti l’anni hè listessu affare per a Lega una o a Lega duie di ghjocu à ballò. Ghjucà o ùn ghjucà un cinque di maghju. In Ingliterra, si ghjoca (drama di Hillsborough), in Italia dinò (drama di u Superga) ma i dui paesi rispettanu iss’anniversariu. Quest
‘annu dinò, u calendariu di L1 hà previstu, in fattu, quattru macci un cinque di maghju: Montpellier-Amiens (trè ore dopu meziornu), Liò-Lille (9 ore di sera), Monaco-Saint-Etienne (cinque ore dopu meziornu) è Toulouse-Rennes (cinque ore dopu meziornu). Di fattu, è à l’occasione di a trentacinquesima ghjurnata di Lega Una, a manifestazione hè spiccata in trè cù un macciu u vennari (Strasbourg-OM), cinque u sabbatu è quattru a dumenica. U fattu di ghjucà issu ghjorni quì hà messu Ghislain Printant anzianu addestradore di u Sporting azezu. Per ellu, cum’è per d’altri è forse assai ghjucadori prufessiunali, u 5 di maghju divaria esse un ghjornu di rispettu è d’umagiu. Si sà chè u Cullettivu purtatu da Didier Grassi s’impegna monda per u rispettu d’issu ghjornu quì. A LFP hà datu, per contu soiu, u so accunsentu per ùn ghjucà ogni sabbatu u cinque di maghju. Ma quest’annu, si ghjoca in dumenica mentre chè a ghjurnata si pudia spiccà in dui invece d’in trè (vennari è sabbatu). Dunque si ghjucherà. Fora di Ghislain Printant, ùn si sà s’è dui anziani bastiacci, più chè liati à a squadra turchina, seranu pronti à ghjucà, unu per Saint-Etienne (Whabi Khazri) è l’altru per Toulouse (Yannick Cahuzac). Ci pudemu dumandà dinò s’è Remy Cabella (Aiaccinu) ghjucherà ellu dinò…Ci vulerebbe à avè una vera reflessione intornu à issu ghjornu quì per arrestà una pusizione chjara. U rapportu à u dolu saria cusì diferente trà i lochi?
