Lauda Guidicelli, cunsigliera esecutiva incaricata di i sporti, l’associ, i svantagi è l’innuvazione suciale hà prisentatu u sette di ghjennaghju scorsu in i scagni di a Regione in Bastia, i scontri di u sportu. Tempi maiò di a pulitica spurtiva vulsuta da a Cullettività, isse ghjurnate, dighjà principiate, volenu permette di scambià cù l’attori di u mondu spurtivu…
Dapoi l’annu scorsu, a Cullettività di Corsica piglia in carica, in più di a prumuzione è di u sviluppu di l’attività fisiche, e cumpetenze ch’avianu, nanzu, i dui departimenti. Cusì, nascenu, quest’annu, i primi scontri di u sportu. U scopu hè di fà ne un arnese di sviluppu à u serviziu di a populazione, pinsà l’azzione publica d’un’altra manera ; pinsà i prughjetti di territorii cù tutti l’attori è reflette, dinò, à a pratica di u sportu feminile. Cù issa demarchja, a CdC vole permette à tutti l’attori di u mondu spurtivu di sprimesi. Per a prima edizione, quattru tematiche sò state scelte : sviluppu di u sportu da u principiu à a cumpetizione, u sportu in i territorii, pratiche spurtive liate cù a natura, evenimenti è manifestazione spurtive…I scontri sò stati principiati u dodeci è u vintisei di ghjennaghju in Bastia è in Corti. Prussimi appuntamenti u nove di ferraghju in Porti Vechju (Casa di Lume) è u vintitrè in Aiacciu (CSJC)…
