U pilotu portivechjacciu hè statu curunnatu campione di u mondu WRC2 a settimana scorsa. Di fattu, è per colpu d’incendii chì anu minacciatu a corsa, u rallì di l’Australia, ultima tapa di u campiunatu di u mondu hè statu cacciatu à l’ultimu mumentu. In testa di a categuria WRC2, u figliolu di u famosu pilotu isulanu, mantene a so avanza è si piglia, à vintidui anni, u titulu di campione di u mondu…
Pierre-Yves Loubet campione di u mondu WRC2, una logica s’è noi fighjulemu u pecorsu di u Portivechjacciu questu annu. Primu à u Portugallu è in Sardegna, secondu in Ingliterra, quartu in Finlanda, cinquesilu in Catalugna, hà mustratu tutte e so qualità durante a stagione. È, di fattu, nanzu à l’ultima corsa in Australia, era in testa di u campiunatu cù 91 punti davanti à u Pulunese Kajetanowicz è u Messicanu Benito. Bastava à compie u rallì per esse in i punti è piglià si u titulu di campione di u mondu. Ma, à l’ultimu mumentu, a corsa hè stata cacciata per colpu di minaccia di a securità di i piloti (incendii). Tandu, u pilotu di a Skoda pudia festighjà. « Sò assai felice di sta vittoria, masimu ch’ella hè stata difficiule à ottene. Avà, m’aghju ripusà nanzu di riparte… »
