A ghjustra di pugilatu sabbatu scorsu à u Rossini, hà tenutu tutte e so prumesse. Un mondu scemu, deci cumbatti ch’anu mustratu u valore di pugilatu corsu, ma quessa, a sapiamu, a famiglia di a disciplina –fora di ring Carghjisanu- addunita è ottu vittorie. Una riesciuta spiegata da Petru Paoli, u capifila di u BCA.
-Chì si pò ritene d’issa ghjustra ? Una riesciuta maiò. Avete vistu cum’è mè u mondu chì ci era. Più d’ottucentu persone è una serata induve avemu pussutu misurà a qualità di i nostru atleti. L’amatori perchè sò l’avvene di a disciplina è i prufessiunali chì sò u spechju…
Chì hè ghjustapuntu u vostru parè nantu à i dui cumbatti prufessiunali ? Dimitri Gourier hà avutu, di fronte à ellu, un avversariu difficiule da vince. Anu vulsutu vince tramindui nanzu à a fine. Hè mancatu à Dimitri forse appena di tecnica ma hè statu vulintariu è ùn mai lintatu nulla. Hè statu più duru per Rachid Azhour chì principia à issu nivellu quì. Travaglia monda è vene pocu à a sala ma hè statu curagiosu è sò fieru di a so vittoria.
L’avvene ? Per avà, tuttu si passa bè. Avemu avutu trè ghjustre, duie in Aiacciu è una in Bastia dapoi u mese di nuvembre. Ci vole à cuntinuà. D’aprile, à u Palatinu, ci serà « La nuit des sports de combat » cù dui campiunati d’Auropa K1 è cumbatti prufessiunali per noi altri. Frà elli, forse, a meza finale di a ghjustra di Francia cù Dimitri Gourier è aspettemu u ritornu di Jo Legato…
