Dopu à un percorsu di trè mesi senza vittoria, a squadra di u presidente Pellegrini hà riesciutu à batte à Istres, eri dopu meziornu (2-0). Un successu chì li face bè è chì forse l’hà da dà un soffiu novu per compie l’annata.
Dapoi u dui di sittembre, Bastelicaccia, ùn avia più vintu una partita. Cinque scunfitte (quattru di fila) è una piccula parità di fronte à u Gallia Lucciana (2-2). A squadra di Ghjuvan Lucca Luciani, campione di Divisione d’Onore a stagione scorsa, facia, cù un ghjocu abbastanza interessante, a sperienza d’un nivellu più altu induve ogni sbagliu si paga subbitu. Ma s’ampara dinò. È cusì, i bianchi è rossi anu zifratu, eri, in casa soia, una bella vittoria di fronte à Istres, anziana squadra di L1 è L2 cù dui ghjucadori cunnisciuti cum’è David Gigliotti (Monacu, Saint-Etienne, ACA) è Kévin Diaz (Monacu, ACA).
Un successu purtatu abbastanza bè è una prima realisazione di Lubrano dopu à cinque minute di ghjocu. Issu fattu hà datu cunfidenza à i bianchi è rossi ch’anu pigliatu a suprana nantu à u so avversariu a maiò parte di u tempu. È, ghjera logicu di vedeli marcà una seconda volta da Moracchini (60ma). Frà tempu, Graziani avia cacciatu un stuccione di Diaz (45ma) cunfirmendu e so qualità è u so rolu in issa squadra quì. In fine, una bella vittoria nanzu d’andà in Le Pontet, ultimu di a classifica, dumenica chì vene, è di receve à…l’ACA.
