À menu di dicianove anni (i festighjerà u 20 di ghjennaghju), u mezuterrenu aiaccinu face, à pocu à pocu, a so strada cù a so squadra di l’ACA. Dopu à un percorsu, da zitellu, in biancu è rossu, hà francatu tutte e categurie per zifrà u so primu cuntrattu prufessiunale l’annu scorsu. Dapoi, cuntinueghja in Lega dui sta volta cù dighjà una piazza di titulariu è duie realisazione. Un ghjovanu da seguità…
« U valore ùn aspetta l’anni ». Cusì dicia Corneille in a so famosa opera « Le Cid ». Una frasa chì pò definisce u percorsu di Matteu Tramoni, a stella nova di l’ACA. Di fattu, ghjè a sola squadra ch’ellu hà cunnisciutu. Da zitellu (principianti), passendu per tutte e categurie è, in fine, fà e so prove, dui anni fà cù a squadra riserva (à menu di diciassette anni) è zifrà, di lugliu u 2017, u so primu cuntrattu prufessiunale. À, scusate, diciottu anni è mezu. A pressione ? « Ciò chì mi primureghja nanzu à tuttu, spiega u ghjuvanottu, hè di travaglià per fà prugressi. Sò felice d’esse, oghje, à issu nivellu quì, ma a so ch’ellu ùn hè chè un primu passu. »
« Bourg-Péronnas, un ricordu maiò »
Matteu principia u so percorsu in Lega dui l’annu scorsu di fronte à Valenciennes, eppo marca, per a prima volta di a so carriera una settimana dopu di fronte à Bourg-Péronnas. « Viniu di entre, Ghislain (Gimbert), lascia passà u ballò, facciu un picculu tiru chì entre in a cabbia. Unu di i rircordi maiò per mè. »
Dapoi, hà fattu a so strada. Uni pochi di macci cù a squadra di Francia (menu di 18 anni), « Un onore è una sperienza tamanta » è un percorsu, à spessu nantu à u bancu l’annu scorsu, chì si compie cù u famosu ACA-Le Havre. « Semu stati tutti dilusi di mancà, da pocu, a Lega una. »
L’Euro di u 2019 à cortu andà cù a squadra di Francia
Oghje, u ghjuvanottu hà francatu un altru passu. Titulariu dodeci volte dapoi u mese di lugliu, hà marcatu à u Red Star è sopratuttu di fronte à Le Havre, « ci era un perfumu di rivincita… » Un percorsu appena scuratu da i resultati di l’ACA. « A fine di a staghjone scorsa era sempre in mente. Avemu principiatu male cù issu pesu sempre quì. Dopu, hè statu difficiule di reagisce. Ma n’avemu, malgratu a classifica, e capacità. »À u nivellu persunale, Matteu cuntinueghja a so carriera. Da u quattordeci à u vinti di nuvembre, hà ghjucatu cù a squadra di Francia (menu di 19 anni) trè partite di fronte à Malta, Lituania è a Belgica per e qualificazione di a cuppa d’Auropa di u 2019 in Armenia. L’occasione, per Matteu di fà dinò i spamperi. L’avvene ? « Per avà, mi sentu bè cù a me squadra. Mi tocca à travaglià dinò è assai per fà prugressi. Chè nulla ùn hè sicuru in issa disciplina. Perchè ùn ghjucà micca un ghjornu in Lega una cù l’ACA. À longu andà, mi piacerebbe à ghjucà in Dortmund… »
D’altri passi da francà…
Identità
Matteu Tramoni
Natu u vinti di ghjennaghju di u 2000 in Aiacciu
1,75 m 68 chilò
Percorsu: AC Aiacciu (furmazione da i principianti)
Primu cuntrattu prufessiunale: lugliu di u 2017 (trè anni)
CFA2 (NIII) : 14 macci, 6 realisazione (2016-2018)
Lega dui : 12 macci, 2 realisazione (2017- nuvembre di u 2018)
Internaziunale menu 18 anni (4 macci) è menu 19 anni (3 macci)
Prima partita in Lega dui : u 19 di settembre di u 2017. ACA-Valenciennes (3-0)
Prima realisazione in Lega dui : u 29 di settembre di u 2017.ACA-Bourg Péronnas (2-0)
Piazza : mezuterrenu o attaccante
Numaru : 11
Cuntrattu : ghjugnu di u 2020
