À nove anni, issu picculu pilotu aiaccinu face dighjà valè e so qualità. Dopu avè participatu, l’annu scorsu à i campiunati di Francia, s’hè piazzatu à a seconda piazza di a so categuria à l’occasione di a « Rotax Max Challenge » (Italia), chì s’hè passata di marzu. Prima tapa d’una cumpetizione chì ne conta una decina…
« U valore ùn aspetta l’anni » scrivia Corneille à a so epica. Parolle chì si ponu adattà à Marc’Andria Quessada. Aiaccinu di nove anni, hà principiatu i sporti mecanichi cù una piccula motò à l’età di…trè anni. « Ghjera in u terrenu famigliale, spiega u so babbu, anzianu pilotu di rallì, a passione l’hè stata tramandata. Eppo, Marc’Andria hà fattu a so strada. » U ghjovanu aiaccinu hà principiatu à u karting di a Gravona, qualchì tempu fà. Nanzu di cuntinuà è di francà un passu maiò. « Semu pertuti in Cuntinente per cuntinuà u so percorsu, aghjusta u babbu, Marc’Andria hà pussutu travaglià in d’altre cundizione è amparà. » Dopu à intrenamenti duie volte à u mese, senza lascià, di sicuru, l’aspettu sculare, u zitellu hà fattu qualchì corsa fora di l’isula. Eppo, s’hè scrittu à i campiunati di Francia, l’annu scorsu, di lugliu. Hà compiu à a quattordicesima piazza nantu à settantu dui pilotu. « Prublemi mecanichi l’anu impeditu di finisce megliu ma fù una bella sperienza. » Questu annu, l’Aiaccinu hà decisu di participà à a Rotax Max Challenge, in Jesolo (Nordu di l’Italia). Una cumpetizione chì include dece tape. Per a prima, hà compiu à a seconda piazza, dopu avè finitu primu à e qualificazione. « Una bella corsa, preciseghja torna u babbu, ci appruntemu per a seguita. » A seguita serà, una tapa in Belgica nanzu à a seconda corsa in Italia. ma Marc’Andria tene in capu un altru scopu, quellu di vince, questu annu, u campiunatu di Francia. È quale semu!
