A 15 anni, l’attaccante « U17 » di l’ACA, chjamatu issa settimane per a seconda volta in a selezzione naziunale « U16 », avanza à pocu à pocu ver di u so destinu. Un destinu chì li pudaria purtà s’ellu cuntinueghja cusì, in u mondu prufessiunale…
Tuttu u mondu, in Aiacciu, cunnosce à Matteo Tramoni, chì hà fermatu u so primu cuntrattu prufessiunale l’annu scorsu. E chì principia, à pocu à pocu, à impone si nantu à u fiancu drittu di l’attacca « bianc’è rossa ». Daretu à ellu, u so fratellucciu, Lisa
ndru, ellu, face dighjà a so strada. Furmatu à l’ACA da chjucu, hè dighjà cunnisciutu…è seguitatu. Prima, di sicuru, da i dirigenti di l’ACA…Ma ci vole à dì ch’ellu ghjoca attaccante centrale, un postu induve i ghjucadori corsi anu difficultà à impone si. È ùn hè u casu di Lisandru, chì facia dighjà parte di u gruppu vitturiosu di a Gothia Cup l’annu scorsu in Sueda è chì cuntinueghja, quest’annu. Ghjucadore di i Naziunale « U17 », hè statu chjamatu una prima volta d’aostu in a squadra di Francia « U16 » per un staziu (27-30). José Alcocer (anzianu ghjucadore di u Gazelec), addestradore d’issa selezzione naziunale l’hà chjamatu una seconda volta per participà à dui scontri di fronte à u Danemarcu issa settimana (una partita sta sera). Tandu, si pò pensà, chè u ghjuvanottu face a so strada. Induve u purterà ? « In Lega una s’ellu riesce à gestisce ellu stessu e duie stagione da vene, assicureghja unu di i so furmatori, t’hà e qualità per andà assai luntanu. Tocca à ellu di piglià ne cuscenza, di travaglià à u nivellu mentale, di cultivà umilità è d’esse abbastanza intelligente. È forse chè ne riparleremu da quì à dui anni… » Aspettendu, u ghjuvanottu, ellu, avanza senza troppu piglià si u capu è cuntinueghja à fà tremà e rete di i so avversarii. Hè dighjà un primu passu…
