L’ACA vole sempre sunnià!

Terza di a classifica dopu à quattordeci partite, a squadra aiaccina cuntinueghja à fà sunnià i so sustenidori. Una situazione logica s’è noi fighjulemu u percorsu è u cuntinutu di i  bianchi è rossi dapoi a fine di lugliu. Tuttu fora d’un azardu…

A terza piazza di Lega duie, ancu s’ellu ci vole à spartela cù d’altri, vintisei punti (i trè quarti di u mantenimentu), a seconda difesa di u campiunatu, è senza scunfitta dapoi u trenta d’aostu (3-1 in Auxerre), ciò chì ci face ottu macci in tuttu, nimu ùn aspettava i bianchi è rossi à sta festa quì à u principiu di a stagione. Ma, s’è noi fighjulemu bè, stu percorsu hè più chè logicu. Subbitu à l’occasione di a prima ghjurnata di fronte à u Havre (2-2), s’hè vistu a qualità di u ghjocu aiaccinu. È ci facia dighjà pensà à epiche maiò di l’ACA vinti anni fà. In tuttu i casi, anu subbitu sviluppatu un ghjocu monda interessante malgratu a marca di fronte à Caen (1-2). Eppo, stu cullettivu hà fattu a so strada, pigliendusi, à tempu, punti in casa soia è dinò fora (quattordeci nantu à vintunu, secondu à parità cù Troyes è Lorient). Una qualità di ghjocu cù una forza mentale chì li permette di tene u so filu, è, à tempu, individualità chì sortenu. Benjamin Leroy in a cabbia, unu di ghjucadori maiò questu annu cù una prisenza in u so spaziu è dui penalty arrestati. Ancu n’ellu Qacim Laçi, l’omu forte di u mezu terrenu biancu è rossu. Hà trova a so piazza è t’hà un rolu maiò in u cullettivu. In fine, davanti, si pò dì ch’ellu face una stonda chè l’Aiaccini ùn anu avutu tanti ghjucadori di qualità: Gaëtan Courtet, chì face travaglione difensivu è stà sempre prisente davanti a cabba avversa, Hugo Cuypers (4 realisazione) sempre in tutti i colpi uffensivi è Matteo Tramoni, cambiatu dapoi ch’ellu hà zifratu u so prolungamentu cù l’ACA. À st’elementi quì, ci vole aghjustà à Bayala, un veru fulettu è, sicura Mathieu Coutadeur, regulatore di u mezu terrenu. Sola scurata, stu terrenu chì  impedisce l’Aiaccini di sviluppà u so ghjocu. L’ACA entre, issa dumenicata in cuppa di Francia (in Saint- Flour) nanzu di riceve à Clermont in Timizolu u 22 di nuvembre. Torna un maccione…