ACA-Valenciennes 2-1 (2-1)
Stadiu François Coty
Tempu frescu
Terrenu mezu mezu
Spettatori : 2000 à pocu pressu
Arbitru : M. Valnet
Arbitri laterali : MM. Goncalves è Guidou
Realisazione : ACA :Touré (8a), Touzghar (43a) , Valenciennes : Haouari (31a)
Avertiti : ACA : Quemper (29a) ; Valenciennes : Blanquart (64a)
ACA : Sollacaro- Youssouf, Khelifa, Vidal, Quemper- Jabol, Mangani (cap.), Nouri (Everson 73a)- Bammou, Touzghar (Jacob 85a), Touré (Soumano 73a) : I : O. Pantaloni
Valenciennes : Louchet- Moore, Poha, Blanquart (Kayi 74a), Basse-Ranse, Masson (cap.), Boutoutaou (Kruse 78a) – Lilepo (Venema 56a), Haouari (Yung 56a), Hamache- I : A. Kantari
Malgratu vinti minuti di bella fattura, l’Aiccini anu suffertu per vince di fronte à Vaenciennes eri sera in Timizolu. Ma una vittoria chì li permette quantunque di compie à prima fasa di u campiunatu à a sesta piazza (30 punti).
Privi da ottu ghjucadori, a maiò parte in difesa, l’Aiaccini sò custretti di prisentà torna una volta, una difesa cuntrale nova (Vidal è u ghjovanu Khelifa, 18 anni),di fronte à una squadra chì hè di capu ind’a conca dapoi qualchì mese. À l’arrivu, i « bianchi è rossi » anu certu suffertu in issa partita quì, ma si piglianu i so trè punti chì li permettenu di passà e feste à u caldu è di ghjunghje, à mezu campiunatu, à trenta punti. In issu macciu appena trappula, l’omi di Pantaloni entrenu cum’ellu ci vole.
Vincenu e sfide in mezu terrenu, piglianu a suprana, un scenariu ch’ùn tarderà micca à purtà i so frutti. Lanciatu in prufundezza da Nouri, Ben Touré riesce à passà u purtieru di Valenciennes è à marcà ind’u angulu difficiule (8a). È l’Aiaccini cuntinueghjanu. Dopu à un serviziu in u fiancu dirittu, di Jabol, Bammou hè vicinu di a seconda marca ma u so tiru hè cacciatu da Louchet (14a). Qualchì minutu dopu, Quemper trappasseghja nantu à u fiancu manca, entre in u spaziu di penalità ma u so centru hè ripigliatu da u purtieru avversu (30a). L’affare si passa piuttostu bè per l’ACA. Ma u contru à centu à l’ora di Hamache è un centru in daretu permette à Haouari di marcà (31a).
Tuttu hè da rifà per l’Aiaccini ch’anu da prufittà d’un sbagliu tamantu di Louchet chì manca u so sgagiamentu per marcà d’un bellu stucciu di Touzghar (43a). In secondu tempu, i ghjucadori di u Nordu anu da piglià à suprana nantu à l’ACA chì serà custrettu di rinculà. U ghjocu direttu di Valenciennes mette in periculu a difesa aiaccina ma Sollacaro è i so difensori anu da tene u colpu. À l’arrivu, pocu impreme u cuntenutu, sò i trè punti i più impurtanti. I « bianchi è rossi » anu da pudè passà e feste à u caldu. L’ACA compie a prima fasa à una bella sesta piazza à a classificà nanzu, forse, di sperà megliu. Prussimu scontru, u 13 di ghjennaghju in Troyes. Eppo s’amparava, dopu à u macciu chè Yacine Bammou, ch’avia ricevutu un’offerta impurtante d’un club stranieru, si n’andava da l’ACA.
