Malgratu un bellu cuntenutu, l’Aiaccini anu persu di fronte à Auxerre (0-1). I « bianchi è rossi » stanu à a tredecesima piazza di a classifica cù quattru scunfitte di fila.
D’un cantu, una squadra chì fila pian’pianinu versu à a Lega una è chì hà persu una sola partita dapoi a ripresa, da l’altri una ch’ùn hà pigliatu chè dui picculi punti nantu à quindeci à l’occasione di i cinque macci passati, issu ACA-Auxerre s’assumiglia à un’opposizione trà u « Chjucu » è u « Gigante ». Ma u tempu forte nanzu u macciu fù, di sicuru, l’ufficialisazione di u stadiu Michele Moretti à partesi di 18.00. Cù assai emuzione è davanti à i ghjovani di u centru di furmazione, di a musica municipale è d’anziani ghjucadori ghjunti apposta (Granon, Colling, Squillaci, Collin, Testa, Bernaud…), Daniele Bufano, presidente di l’ACA, Danielle Antonini (eletti), Stefanu Vannucci, aghjuntu incaricatu di u sport à a Cità d’Aiacciu ma dinò dirigente di l’ACA, Chantal Moretti, surella di l’anzianu presidente, è Don Jo Luccioni, elettu è sustenidore di l’ACA anu pigliatu a parolla, mintuendu, ognunu, ciò ch’ellu era Micheli Moretti è sopratuttu ciò ch’ellu fece per a so squadra. Un tercanu, omu di stintu, di core, ch’avia tenutu a prumessa in u 1992, di fà cullà l’ACA da a PHA à a prima divisione in dece anni. I dirigenti di u 2008, dopu à a so sparizione, avianu elli dinò fattu a prumessa, quella di dà u so nome à u stadiu. Ciò chì hè statu fattu issu luni sera.
L’Aiaccini si ponu murzicà i ditti d’ùn avè cunvertitu duie occasione in e cinque prime minute. Nè Jacob, chì tira di manera troppu debule (1a), nè Ibayi chì manca u quadru mentre ch’ellu era in u spaziu di penalità avversu (3a) ùn riescenu à cunvertisce issa bella entrata in a partita. Perchè dopu à dece minute, l’AJA hà cumenciatu à fà corre u ballò…è l’Aiaccinu. Senza avè occasione impurtante ma una squadra avversa maestra di u ghjocu. Peccatu, ci hè vulsutu un centru micca periculosu d’Akpa à a mez’ora di ghjocu è u sgagiamentu di Sollacaro di u dui pugni per permette à Soumaré di marcà (27a). L’ACA cerca à reasgisce ma corre sempre apressu à u ballò. Eppuru, à l’ultima seconda di u primu tempu, Ibayi rimette à Touré di u capu ma u stucciu putente di quellu trova un grande purtieru avversu (45a).
Sforzi vani
In secondu tempu, l’Aiaccini piglianu u ghjocu à contu soiu. Fora di qualchì contru, l’AJA si ne stà in difesa è rinculeghja assai ma a so tecnica li permette di mantene a marca. L’ACA averà, torna, unepochi d’occasione ma hà da mancà di realisimu vicinu à u spaziu di penalità avversu. Baretto stuccia da vinti metri ma Donovan Leon caccia tuttu (65a). In l’ultime minute, Vidal d’una bella capata, trova torna u purtieru di l’AJA. L’entrata di i ghjovani Martinez-Jullien è Coutinho porta un soffiu novu ma vanu. Una scunfitta per l’Aiaccini, a seiesima di fila. Ma un cuntenutu chì ci lascia quantunque sperà per a fine di a stagione.
Stadiu Micheli Moretti
ACA-Auxerre (0-1)
Tempu frescu
Terrenu bonu
Spettatori: 7000 à pocu pressu Arbitru: M.Millot
Arbitri laterali: MM. Benkemouche è Marmion
Realizatori
Auxerre: Soumaré (27a)
Avertiti
ACA: Ibayi (14a)
ACA: Sollacaro- Youssouf, Vidal, Avinel, Quemper (Soumano 68a)- Jacob (Nouri 49a), Strata, Jabol (Martinez-Jullien 85e), Barretto (cap.)-B. Touré, Ibayi (Coutinho 85e)-ad: O.Pantaloni
Auxerre: Leon-Joly, Jubal (Agouzoul 42u) Pellenard, Akpa- Owusu, Raveloson- Ayé, Perrin (Diousse 74a), Onaiwu- Soumaré (Sinayoko 60a)-ad: C. Pelissier
