Adunita issi pochi ghjorni per esaminà u casu di qualchì squadra di Lega dui, a DNCG hà decisu di retrugradà l’ACA di manera cunservatoria à a fine di a staghjone. Una misura finanziaria è una pressione in più nantu à e spalle chì vene aghjustà si à u percorsu spurtivu debule…
I bianchi è rossi ùn avianu micca bisognu di què ! Diciottessima di a classifica di Lega dui (tredeci punti), un puntu nantu à novi in i trè ultimi macci, cacciata senza gloria in Alès issa dumenicata in cuppa di Francia (2-0), a squadra aiaccina hè avà, minacciata da u gendarme finanziariu di u ghjocu à ballò francese. Adunita issi pochi ghjorni, a DNCG hà pigliatu a decisione di retrugradà l’ACA è Sochaux à a fine di a staghjone, pocu impreme u so resultatu spurtivu. Una decisione, chì, di grazie, ùn hè definitiva ma chì mette una pressione in più nantu à e spalle aiaccine. Masimu chì a situazione finanziaria (pache di i ghjucadori) hè, dapoi ghjugnu scorsu, inquadrata cù, in più, l’impussibilità, di piglià ghjucadori à a fine di dicembre. L’ACA t’hà, avà sette mesi per ristabilisce a so situazione. Ghjè in issu cuntestu penibile chè a squadra aiaccina riceve issu vennari à Clermont. Sperendu, dighjà, i trè punti.
