U campione di u mondu di bucciata era in Aiacciu iss’ultimi ghjorni à l’invitazione di u cumitatu di u Pumonte per sparte a so sperienza è so passione di a disciplina cù ghjovani di u quartieru di u Binda…
Campione di Francia è campione di u mondu tante vo
lte, Henri Lacroix hè ghjuntu dui ghjorni in Aiacciu, induve-postu chè i passiunati ùn si contanu più- ellu t’hà parechji amichi. U ghjucadore hà rispostu à l’invitazione di Patrick Borelli, presidente di u cumitatu di bucciata di u Pumonte. « Avemu vulsutu dà una sperienza tamanta à i nostri ghjovani, spiega u presidente, fà prugressi è dinò piglià cuscenza di u travagliu à fà per ottene un certu nivellu. »
Cusì, Henri Lacroix hà animatu dui stazii cù ghjovani di u quartieru di u Binda, in leia cù l’associu « La Boule du Stade. » Una manera di cuntinuà un travagliu chì porta dighjà i so frutti chè u nivellu hè quantunque interessante in Corsica. « I ghjovani facenu prugressi, certi anu ottenuti a so piazza per ghjucà i campiunati di Francia. Issu genaru d’attelli li permette di travaglià detagli cum’è a cuncentrazione per sbuccà, à longu andà, nantu à u nivellu internaziunale. »
Una bella sperienza da rifà per i ghjovani è un spechju impurtante per a disciplina.
