A vintitresima edizione di u ghjochi di l’Isula si tene in Cismonte da u 21 à u 26 di maghju. Quattordeci isule seranu pronte à sfidà si intornu à una quindicena di discipline. Guasgi dui mila zitelli di tredeci anni sò aspettati in Bastia, Biguglia, Lucciana, u Borgu è Furiani. A delegazione corsa s’è appruntata in Zonza…
Appuntamentu maiò per i zitelli di tredeci anni dapoi u 1997, i ghjochi di l’Isula adduniscenu dapoi issa data quì, spurtivi chì ghunghjenu guasgi di tutti i Cuntinenti. Questu annu, l’appuntamentu, privistu prima, nantu à l’isula d’Elbe ma scambiatu à l’ultimu mumentu per via d’un’urganisazione ch’ùn rispettava micca tutte e regule, hè pigliatu in Corsica (Cismonte) da quì à una settimana è nantu à parechi siti: Bastia, Biguglia, Lucciana, u Borgu, Furiani. E delegazione anu da riprisentà quattordeci isule: Azzori, Baliari, Capiverde, Corfù, Corsica, Elbe, Guadeluppa, Jersei, Malta, Martinica, Sardegna, Sicilia, Guiana. In tuttu, a cumpetizione ne pò addunisce sin’à vintitrè (numaru di i so membri) ma si dipende di l’edizione. Per ciò chì tocca à e discipline, ne ritruvemu d’impurtanza maiò cum’è u ghjocu à ballò, u rugbì ma d’altre (nutera, atletisimu, ginnastica, arti marziali…). D’altronde, uni pochi di campioni famosi anu participatu à iss’evenimentu maiò (Rafael Nadal, Priscilla Gneto, Marcos Freitas, Morhad Amdouni, Cristiano Ronaldo). issa cumpetizione serà, di fattu, picculi ghjochi olimpichi cù una partipazione maiò (dui mila zitelli). Frà elli, centutrenta zitelli corsi ch’anu da cercà à fà si valè…A delegazione corsa s’hè appruntata in Zonzau nove di maghju per esse pronta à l’appuntamentu.
