Figura maiò di u ballò uvale corsu, Ghjilormu Torre, anziani ghjucadore di u RCA, n’hè, oghje, è dapoi una vintena d’anni, u presidente. Passa u so tempu in Vignetta , Sarrula, à gestisce cù tutti l’altri dirigenti, tutte e categurie. Una passione ch’ellu riesce à tramandà. Cusì, dopu avè fiascatu quattru anni di fila per a cullata in Divisione d’Onore, i celi è bianchi sò pertuti cù trè vittorie è una scunfitta. L’occasione, per u so presidente, di fà u puntu nantu à a situazione di i soii…
Chì pensate di u principiu di a staghjone di a vostra squadra ?
Pensu chè no semi partuti abbstanza bè. Trè vittorii di fila è una scunfitta in Noves induva semi passati accantu. Ciò chì pò spiegà a marca assai larga (quaranta à zeru). Ci sò macci cum’è quessu ind’una stagioni. Ci voli à essa capaci di gestiscili.
Chì saria u scopu per u RCA postu ch’ùn avete micca riesciutu à cullà issi quattru anni passati ?
Ùn vulemi micca avè pressioni annantu à i spaddi. Piddemi i partiti cum’eddi ghjungjani senza essa primurosi. U gruppu hè abbastanza ghjovanu cù assai ziteddi furmati quì. Parechji ani vulsutu vultà dopà avè piantatu pà via di u travaddu o di i studdi. Pudemi dinù cuntà nantu à Michael Tristani (Colomiers) è Christofer Capponi (Provence Rugby) chì erani, tutti i dui in riserva di Pru D2. U scopu hè, dunqua, di fà prugressi. Semi, oghji, sicondi di a classifica, ma u campiunatu principia ghjustu avà. Ci voli à cuntinuà à travaddà in issu sensu quì. Faremi i conti à a fini…
À chì ne semu di a furmazione ?
Ùn hè tantu faciuli per ciò chì tocca à i liscenzi, appena da sottu. Hè sempri cusì dopu à una cuppa di u mondu di ghjocu à ballò. A sapiami. Semi, oghji, à pocu pressu à dui centu cinquanta, ciò chì hè quantunqua u numaru u più impurtanti di Corsica. Vulemi cuntinuà à furmà ziteddi d’ind’è no è cuntemi nantu à dui categurii (15 anni è 17 anni) chì sò tramindui primi di a so classifica. Hè dighjà una bona ! Pà u restu, a scola di rugby ci permetti di travaddà à longu andà…
