A squadra « rossa è turchina » passava issu mercuri davant’a cummissione di disciplina per l’evenimenti ch’eranu accaduti a settimana scorsa à a fine di a partita in Clermont. Ancu s’ùn ci vole micca troppu fà e vittime, ci tocca à ricunnosce chè a cummissione hà pichjatu abbastanza forte nantu à a squadra aiaccina. È sanzione sò quantunque dure per i ghjucadori di u Gaz: sette macci per Julian Palmieri, quattru per JB Pierazzi (unu attempatu) è trè attempati per Julien François, addestradore aghjuntu. Senza cuntà Thibault Campanini è David Gomis (regula di e trè cartuline gialle in deci macci). E sanzione principeranu issu marti à mezanotte, fora di JB Pierazzi, cacciatu in a partita in Clermont…
À spessu, e squadre corse
di ballò danu u bastò per fà si minà. Quessa hè sicura ch’è noi semu forti per fà e vittime ch’ella sia in Aiacciu o in Bastia. Ma fora di què, ci vole quantunque à ricunnosce ch’ogni volta ch’una squadra corsa passa davant’à a cummissione di disciplina, falanu e cutrate! Pocu impreme u ghjucadore, u dirigente è ancu u scenariu. Un fattu cunfermatu, d’altronde, da ghjucadori o addestradori « d’altrò » chì dicenu sempre, quand’elli sò ind’è noi, chè e cundizione ùn sò micca listesse ch’ella sia à u nivellu di l’arbitru o di e sanzione quand’accade qualcosa.
Ci vole, di sicuru, à cundannà ciò chì hè accadutu à a fine di a partita in Clermont (azzuffu maiò) ma, à tempu, misurà e sanzione cù d’altri evenimenti chì si passanu nantu à d’altri terreni di Lega 1 o 2 (Liò, Marseglia, Parighji. Montpellier a settimana scorsa, Grenoble, Le Havre l’annu scorsu).
Sette macci per Julian Palmieri, suspesu sin’à u 4 di dicembre in Sochaux, quattru (unu attempatu) per JB Pierazzi sin’à u derby di fronte à l’ACA ( u dui di nuvembre). È ci vole dinò aghjustà à issa lista, Thibault Campanini è David Gomis per ciò chì tocca à u terrenu (regula di e trè cartuline gialle). Julien François, aghjuntu d’Albert Cartier s’hè pigliatu, per contu soiu, trè macci attempati. Face, in tuttu, cinque aiaccinu suspesi. Quattru (fora di Pierazzi) à partesi da marti (mezanotte). Torna una volta, pensemu ch’ù ci vole micca à dà u bastò ma ricunnosce, à tempu, chè e sanzione sò sempre più impurtante per i Corsi. Hè cusì. A sola risposta à dà à ste sanzione, deve vene da u terrenu. O cum’è l’anu fattu certi dirigenti, ùn andà micca davant’à a cummissione di disciplina per difende casi quand’è noi cunniscimu sempre u resultatu.
Aspettendu, u GFCA, serà, per contu soiu, privatu di quattru ghjucadori per andà vennari chì vene, in…Lens. Pare fattu appostu…
