U GFCA hè in testa di a classifica di N1 à parità cù Chambery dopu à ottu macci. L’occasione, per u so presidente di fà u puntu nantu à a stagione…
U GFCA capifila di a classifica. Chì ne pensate ?
À dilla franca, ùn m’aspettava micca à stu percorsu. Cù a squadra tecnica è dopu avè pigliatu ghjucadori cum’è Erard, chì hè vultatu ind’è noi, Thévenet, revelazione ma cunnisciu u so valore è Cappelle, vuliamu mustrà e nostre qualità à mezu un gruppu pocu scambiatu dapoi l’annu scorsu. Dopu, ghjucadori cum’è Brunetti o Coggia, impurtanti in i spugliatoghji sò cresciuti dinò. Aviamu pensatu à ghjucà una di e cinque piazze à a metà di u campiunatu. Semu primi, hè una bona. Ci hà da permette d’avanzà megliu è di ghjucà libari. Ma pigliemu i macci unu apressu à l’altru.
Vale à dì chè l’ambizione anu da cresce ?
Innò ! Sapemu d’induve ghjunghjemu è induve vulemu andà. Per noi, u scopu hè una piazza in i trè primi, u mantenimentu di a squadre reserva in NIII è a furmazione di i ghjuvani. Travagliemu di manera à fà cresce u GFCA, vale à dì purtà, à più o menu longu andà ghjuvani ver di a squadra una. Avemu da avanzà per, da quì à u 2022 ghjucà a cullata in seconda divisione. Saria un passu impurtante da francà masimu à u nivellu di e finanze ma, à tempu, sapemu chè ci sò pussibilità cù i diritti TV è forse d’altri mezi. Oramai, travagliemu dighjà nantu à a ricerca d’aiuti finanziarii di manera à esse pronti quandu u ghjornu venerà.
Ghjucà à u Palatinu ?
Porta qualcosa in più ancu s’è u Rossini ci manca. Ma avemu, quì, masimu per ciò chì tocca à cundizione di ghjocu, un arnese tamantu chì và in u sensu di ciò ch’è noi vulemu fà. È tengu à ringrazià e culletività per u so sustegnu.
