Dopu à un principiu di stagione di quelli, u GFCA hà cunnisciutu a so prima scunfitta, sabbatu scorsu, in Istres (28-30). L’occasione, per u so presidente, di fà u puntu nantu à a situazione di a so squadra.
Una prima scunfitta per u GFCA. Divia accade?
Pensu ch’ella hè a seguita logica dopu à macci abbastanza difficiuli in i so cuntinuti. Ùn ci vole micca à scurdà si ch’è no aviamu vintu ghjustu ghjustu una settimana nanzu di fronte à Marseglia. Avemu una bella squadra ma eramu forse troppu cunfidenti. Quallà, in Istres, semu cascati contru à una bella squadra chì meritava a so vittoria. Ma ùn vi ne fate, avemu da reagisce
Un statutu di favuritu da mantene quantunque ?
Saint-Etienne ùn hà pussutu fà chè a parità in casa soia, tenimu a nostra prima piazza. Dopu, hè vera ch’è no semu aspettati da per tuttu. Avemu annunciatu l’ambizione di cullà in fine di campiunatu. È pensu ch’è no t’avemu a capacità, e qualità è u stintu per riesce. Ma a stagione hè longa, ci tocca à esse regulari sin’à a fine.
Aldilà di a squadra una, comu si passa a furmazione ?
Aghju sempre dettu, quand’aghju ripigliatu u postu di presidente, chè a furmazione era a priurità. Ghjucà in D1 o in D2, pocu c’impreme. Per mè, hè megliu di ghjucà in Naziunale cù una parte maiò di ghjucadori corsi. U scopu di u GFCA, ùn hè di fà vene à Karabatic o Omeyer ma di furmà zitelli, da ghjovani, per ch’elli pudessenu un ghjornu, purtà a maglietta rossa è turchina cù a squadra una.
