A 57 anni, l’anzianu addestradore di u Sporting si ne volta in Corsica. Senza squadra dapoi u mese di ferraghju dopu à una rumpitura di cuntrattu cù Laval, hè statu numatu à u capu di u GFCA induve ellu avia ghjucatu in l’anni 88 è 89 in terza divisione.
U nome di Francè Ciccolini per piglià a seguita di Hervé Dellamagiore, « ringraziatu » in a settimana, circulava in cità Imperiale. A nutizia hè stata ufficialiszata issu marti nantu à u situ di u GFCA. Di fattu, è dopu à uni pochi d’imbrogliu cù Laval (naziunale) ch’ellu avia quantuque piazzatu à u toccu à toccu cù Le Mans insù di a classifica di N1, u Cuzzanacciu di 57 anni si ne volta in Corsica. Anzianu furmatore (avia vintu u campiunatu di Francia 16 anni in u 2002 cù Bastia è a cuppa Gambardella cù Monaco in u 2011) è addestradore di u Sporting (2004-2005 è 2016-2017) ritrova un bancu in Aiacciu induve ellu era statu ghjucadore (1988-1989) in terza divisione. Hè u quartu addestradore di u GFCA dapoi a so falata in Lega dui, di ghjugnu u 2016 dopu à Vannucchi, Cartier è Dellamaggiore. Circarà, forse, à tramandà virtù ch’anu mancatu in issi pochi tempi à u Gazelec. Franè Ciccolini s’hè ingaghjatu per dui anni. Ùn si sà, per avà, s’è u GFCA ghjucherà in N1 o in Lega 2. Risposta un primu di lugliu…
