Christian Leca hà pigliatu a seguita di Léon Luciani à a presidenza di l’ACA marti scorsu. Un’ufficialisazione chèi s’hè fatta à tempu à a presentazione di e magliette di a stagione è di i ghjucadori novi. Ghjè cù un’emuzione particulare chè u sestu presidente (dopu à Antoine Antona, Michel Moretti, Jacques Peretti, Alain Orsoni è Léon Luciani ci dà u so parè nantu à sta situazione.
Sete u presidente novu di l’ACA. Un’emuzione particulare ?
Sicura ch’e sò à u capu d’un club ch’aghju sempre avutu in core à mè. Zitellu, in l’anni sessanta, aghju cunnisciutu u stadiu Jean Lluis. Eru dighjà sustenidore « biancu è rossu ». U fattu di ritruvà mi quì ancu s’eiu sò à l’ACA dapoi u 2012, hè qualcosa di speciale.
Comu cuntate di sviluppà l’ACA ?
Avemu da esse in a cuntinuità di ciò chì s’hè fattu sin’à d’avà cù un impegnu più impurtante nantu à a furmazione di ghjovani. L’ecunumi hè abbastanza debule in Aiacciu, hè dunque difficiule per truvà ghjente chì si volen impegnà è purtà soldi. Pensu, dunque, chè a soluzione passa per a furmazione di ghjovani ch’anu da esse vinduti cum’è d’altronde in d’altre strutture di Lega una o Lega dui. Hà da permette à l’ACA di sviuluppà si è d’avanzà.
U vostru primu travagliu ?
Avemu da creà un postu di Direttore Generale per mette in piazza u nostru travaglu. Ghjè ellu ch|i hà da gestisce stu duminiu. Stu fattu hè statu guasgi impostu da a DNCG. Cù l’esisgenzie di u ghjocu à ballò mudernu, semu custretti d’avanzà è d’adattà ci. Semu passati vicinu da u Naziunale cù tuttu ciò ch’impunia sta relegazione. Avemu da rimette tuttu in ordini.
S’apre una pagina nova per l’ACA ?
Spergu. Ma ùn ci scurdemu micca di u travaliu fattu dapoi quattru anni da Léon Luciani. Hà avutu assai prublema induve ùn ci era per nulla è in sta perioda difficiule, hà tenutu bè è purtatu u battellu « biancu è rossu » comu ci vulia. U ringraziemu per u so impegnu, a so passione è u so travagliu. Avemu da scambià appena di funziunamentu cù a ghjunta di parechji capi d’imprese ch` ;i si volenu impegnà.
Una squadra cumpetitiva à u nivellu spurtivu ?
Malgratu una sorte cuntraria, avemu riesciuti à piglià un ghjucadore rinumatu cum’è Gaëtan Courtet, assai dumandatu. Hè dighjà una bona. Daretu, ci hè dinò Cyrille Bayala, un attaccante chì ci hà da purtà assai è trè altri ghjucadori ghjovani. N’aspettemu forse un altru. A squadra serà cumpetitiva dighjà per riceve Le Havre stu vennari. Spergu chè u publicu serà numarosu per ghjunghje à susteneci.
Chè scopu per l’ACA questu annu. U mantenimentu?
È perchè micca di più…
