L’atleta isulana, capimachja di a disciplina in Corsica, hè pertuta, issu luni in Madrid per participà à i campiunati di u mondu. Dopu à resultati ottenuti in Germania è à u Giapponu, u scopu hè di fà si rimarcà da i respunsevuli di a squadra di Francia è, di sicuru, marcà punti per i ghjochi olimpichi in Tocchiò da quì à un annu è mezu…
« Alexandra t’hà un annu è mezu per fà si rimarcà è piglià punti per ottene à so piazza per Tocchiò ». Cù isse parolle, Jean-Michel Feracci, babbu di l’atleta aiaccina, presidente di a Lega Corsa di Karaté è, à tempu, cunsiglieru di a so zitella, annuncia u culore. Dopu à resultatu ottenuti dapoi settembre in Germania è à u Giapponu, Alexandra Feracci, capimachja di a disciplina in Corsica, hè dodecesima à u nivellu internaziunale. Ma, in Tocchiò, solu ottu seranu qualificate. Ciò chì mostra dinò, u passu da francà per l’Aiaccina. Une pressione particulare, quella di vince a so piazza per a cumpetizione a più ricercata da i spurtivi dopu à a cuppa di u mondu di u ghjocu à ballò. Si sà, di fattu, dapoi più d’un annu chè u Karaté serà di manera ufficiale, disciplina olimpica in Tocchiò da quì à un annu è mezu. « Alexandra hè abituata à gestisce a pressione, aghjusta u so babbu, travaglia in issu sensu quì è serà pronta. »
I campiunati di u mondu, in Madrid, da issu marti è sin’à dumenica, ponu permette à l’atleta di fà si rimarcà è sopratuttu di marcà punti…A delegazione insulana hè pertuta da Aiacciu, issu luni. Per Alexandra, a preparazione hè stata principiata dapoi u mese di settembre, trè ghjorni in Parighji è trè in Aiacciu. Fisicu, mentale, è ancu, per a prima volta, una spezia di « teatralisazione » travagliata cù Livia Stromboni per sapè si prisentà è d’una manera generale, teatralizà à l’usu d’una messa in scena, a so prisentazione o i tempi più debuli è corti.
S’è tuttu và bè, Alexandra, chì principia a cumpetizione issu marti à meziornu, pudaria esse qualificata per a finale o a terza piazza, issa dumenicata. « Si dipenderà di l’imbusca… ». Risposta dopu meziornu.
