L’atleta aiaccina, chì participava, issa dumenica, à i campiunati d’Auropa di in menu di vintunu anni in AAlborg (Danemarcu), hà ottenutu a medaglia di bronzu dopu à un bellu percorsu. Una medaglia chì li permette di fà, à pocu à pocu, a so strada in a disciplina…
I campiunati d’Auropa di i menu di vintunu anni si tenianu a dumenicata scorsa
in Aalborg (Danemarcu). Per l’occasione è fighjulendu i ghjochi ulimpichi di u 2020 in Tocchiò, una reglementazione nova era messa in piazza da a Federazione Internaziunale. Cusì, ottu gruppu eranu privisti. È ghjè in quellu, forse, u più difficiule di a categuria chè Letizia Feracci riesce à finisce à a terza piazza. L’atleta isulana hà pussutu francà i giri cù u stintu è e qualità ch’è noi li cunniscimu. In i quarti di finale, finisce à a seconda piazza daretu à l’atleta taliana Carola Casale (finalista di l’ultimi campiunati d’Auropa). Per, in fine, piglià si a terza piazza dopu à un’ultima vittoria di fronte à a l’atleta pulunese Kamila Bracikowska. « Sò fiera d’avè purtatu cusì altu i culori di a me squadra di l’ACA, di a Corsica è di a Francia, hà spiegatu Letizia Feracci dopu à a cumpetizione. Appena corta per andà in Tocchiò, l’atleta aiaccina pudaria esse pronta per i ghjochi ulimpichi di Parrighji, in u 2024.
