Dopu à a vittoria di u Sporting, sabbatu in Furiani, u GFCA hà fattu, ellu, a so valisgia, dumenica, paghendu, cum’è d’altre squadre prufessiunale, a rivolta di i chjuchi in cuppa di Francia…Di colpu, ùn ci serà chè Bastia per riprisentà a Corsica in i sedicesime di finale. In più di fronte à Noisy le Grand (R1) chì vene di caccià
u Gazelec da a cuppa di Francia…
Marseglia, Montpellier, Angers, Nîmes, Niort, Clermont, u ventu di a cuppa di Francia hà paratu parechje squadre prufessiunale. È, peccatu, u GFCA face parte di e squadre cacciate. Una scunfittta in Noisy le Grand (R1, 2-1) chì vene male dopu à trè scontri pusitivi in campiunatu è nanzu di ripiglià u campiunatu issu vennari di fronte à Auxerre. À dilla franca, ùn si pò fà rimproveru à l’Aiaccini chì a cuppa t’hà, da veru e so surprese tutti l’anni. Ci vole à accettà lu. Ancu s’è un cuntinutu ùn hè statu tremende, si pudia pensà quantunque u Gazelec capace di francà issu giru. Ma u scenariu d’issu macciu n’hà decisu altrimentu…U più difficiule da accettà, fora di a scunfitta hè chì l’imbusca ci dà in sedecesime di finale SCB-Noisy le Grand. Un’uchjata, forse, à i « rossi è turchini ». È di sicuru, l’occasione per l’omi di Stefanu Rossi di cuntinuà a so strada…
