À l’età di quindeci anni, issu ghjuvanottu di ceppu mezu viculese, mezu murzese hà persu in finale di u campiunatu di Francia, à settimana scorsa in Parrighji. Una cumpetizione è qualità chì puderanu permette, à longu andà, à issu zitellu, dighjà maestru di a so categuria in Corsica, di stallà si forse, à mezu à i più forti à u nivellu naziunale…
U nome d’Alexis Accardo hè dighjà monda cunnisciutu in Corsica per ciò chì tocca à a pratica di u kickboxing, una disciplina induve l’atleti anu u drittu di fà i cumbatti cù i pugni è e ghjambe. À pocu à pocu, issu zitellu, Viculese d’u cantu di u so babbu (campà d’altronde quallà) è 
Murzese d’u cantu di a so mamma, hà fattu a so strada in questa disciplina. Dighjà campione di Corsica, avia participatu dui anni fà, in Parrighji è Marseglia, à i campiunati di Francia cù un percorsu ch’ùn era micca male per un zitellu chì « surtia » di u so cuntestu abituale. Una scunfitta in quarti di finale è sopratuttu una bella sperienza. Sta volta, u licenziatu di u FTC di Pascal Chomet, in Aiacciu, hà resciutu à ottene a seconda piazza dopu à una scunfitta in finale, a settimana scorsa in Parrighji, di fronte à Alexis Demeter. « Torna una bella sperienza, spiega u ghjuvanottu, pensu d’avè cumbattutu bè di fronte à un avversariu ch’ùn era faciule. » « Alexis hà fattu prugressi, precisa Pascal Chomet u so addestradore, cresce à pocu à pocu… » L’atletu hè avà vultatu ind’è ellu è hà ripigliatu u caminu di a scola. À tempu, s’appronta à participà, u mese chì vene, à i campiunati di Francia K1 (pugni, ghjambe è ghjinochju) in Grenoble. Forse, sta volta, per cercà a medaglia d’oru…
