U ricrutamentu di l’ACA cuntinueghja cù a zifra, eri in Timizolu, d’Al Hassan Touré, un attaccante australianu di vintitrè anni chì vene à rinfurzà un settore induve ci hè u bisognu, masimu dopu à a partanza, nanzu à a fine di a prima fasa, di Yacine Bammou.
Dopu à a ghjunta di Josué Escartin à u principiu di u mercatu, u cinque di ghjennaghju, l’ACA hà ottenutu, eri un secondu rinforzu, sta volta in u settore uffensivu. Al Hassan Touré, un attaccante australianu d’origine ghineana s’hè ingaghjatu durante un annu è mezu à l’ACA cù a pussibilità di prulungà . Furmatu in Australia induve ellu hè natu, u ghjovanu attaccante, chì avia ghjucatu in Adelaïde è Mac Artur, avia vintu a cuppa d’Australia nanzu di parte l’annu scorsu in Sanliurfaspor, in Turchia. « Hè un ghjucadore ch’aghju seguitatu l’annu scorsu, spiega Yohan Cavalli, direttore spurtivu di l’ACA, un ghjucadore chì t’hà vitezza, tecnica è putenza per ghjucà nantu à u fiancu. U prufilu vicinu di quellu di Cyril Bayala. Hà ghjucatu sin’à a fine di dicembre, hè prontu à u nivellu fisicu ma li tuccherà ad avè una perioda d’addatazzione. » Al Hassan Touré purterà u numeru 19. Un altru ghjucadore seria aspettatu in Timizolu nanzu à a fine di u mercatu.
