Aiacciu terra spurtiva !

0

 E manifestazione spurtive di l’annu sò state prisentate issu luni matina  in merria d’Aiacciu. Intornu à Laurent Marcangeli, Stéphane Vannucci, aghjuntu dedicatu à l’attività spurtive, è tutta a squadra di u serviziu.  Sedeci manifestazione sò previste da quì à u mese di dicembre. Frà elle, cumpetizione naziunale è internaziunale. U tuttu intornu à u scopu cumunu, quellu di fà d’Aiacciu, una « terra spurtiva »…

0[1]Ci era u mondu issu luni à u Salone Napuliò di a Merria à l’occasione di a prisentazione di l’evenimenti spurtivi da vene in a Cità Imperiale sin’à u mese di dicembre. Intornu à Laurent Marcangeli, merre d’Aiacciu, Stéphane Vannucci, aghjuntu dedicatu à l’attività spurtive, tutta a squadra di u serviziu è dinò d’altri eletti. Da issu 15 di marzu è sin’à a fine di dicembre, sedeci manifestazione anu da esse urganizate. Frà elle, certe sò dighjà monda rinumate ch’anu fattu a so strada : marathon d’Aiacciu (u 7 d’aprile), trail Napuliò (u 5 di maghju), a ghjustra internaziunale U11 di l’ACA (di ghjugnu) o a ghjustra internaziunale di tennis di Mezavia (da u 6 à u 14 di lugliu). Ritruvaremu dinò, trè manifestazione maiò cum’è e ghjustre internaziunale di Futvolei (da u 19 à u 21 di lugliu, piazza Miot è da u 31 di lugliu à 2 d’aostu piazza à u Diamante) è, di sicuru, a ghjustra internaziunale di bucce (da u 10 à u 14 di lugliu piazza à u Diamante). Si tratterà dinò di bucce cù u Prezzu maiò di a Cità d’Aiacciu (4 à u 10 di ghjugnu),  una ghjustra dedicata à Christian Torre (sempre di ghjugnu) è u campiunatu di Francia di i cionchi (da l’11 à u 14 di ghjugnu). Fora di ciò chì hè dighjà cunnisciutu, averemu dinò un Enduro mundiale motociclistu (i 15 è 16 di ghjugnu in giru à Aiacciu) è i campiunati di Francia di Jet schì (da u 22 à u 24 di settembre vicinu à a marina San Francè). È per esse cumplettu, ci seranu dinò, d’altre manifestazione, lucale quesse quì, cum’è u 19mu giru di Corsica storicu (corse di vitture da u 7 à u 12 d’ottobre) o l’Urban Trail Aiaccina (di settembre). « Avemu sempre vulsutu fà di l’attività spurtive una priurità, spiega Stéphane Vannucci, sviluppemu una dinamica in issu sensu quì senza sminticà i ghjovani  è e strutture chì mancanu. Dapoi u 2014, avemu spesu 4 millioni d’auri intornu à e strutture. »

Si principia, dunque issu 15 di marzu cù una a corsa di vitture di u circondu Aiaccinu. Deci mesi, in tutti, dedicata à l’attività spurtive…

 

Partager.

Réagir en direct