L’affare GFCA-PFC chì paria finita dopu à a decisione di a LFP di mantene u resultatu di u vintisette di
lugliu scorsu (1-1), dendu ragiò à u Gazelec in appellu, hè entruta ind’una terza fasa vennari scorsu. In fine, a LFP hà accettatu a pruposta di u CNOSF di dà a vittoria à a squadra parighjina. Incredibile…
U macciu, amministrativu, quessu quì, trà u GFCA è u PFC hè entrutu ind’un’altra fasa, vennari scorsu. Attu unu : Nimu s’hè scurdatu chè in a prima ghjurnata di Lega dui, u Gazelec avia fattu ghjucà à Boupendza ch’ùn era micca qualificatu (fine di u macciu : 1-1). Resultatu. Vittoria è trè punti per a squadra parighjina. Attu dui : appellu di i dirigenti aiaccini, mintuendu chè a FFF ùn avia micca fattu u so travagliu (micca Boupendza nantu à a lista di i suspesi). Resultatu : parità cunfermata. Si paria compia quellu affare ancu s’è i Parighjini avianu chjamatu u CNOSF è speravanu vince torna una volta. Senza dubbitu, ghjucadori, dirigenti è ancu sustenitori pudianu pensà à u macciu di cuppa di Francia è appruntà, da quì à una settimana, un spiazzamentu periculosu in Metz, capu di a classifica di Lega dui. Ma, à a LFP, li piace, forse, à cercà i peli inde l’ovi ch’ella hà accettatu a pruposta di cuncilazione di u CNOSF. Resultatu : un puntu in menu per u Gazelec è dui in più per u PFC. À dilla franca, issa decisione pare strana chè u GFCA avia fattu a demustrazione ch’ellu era in u so dirittu. Postu chè, fighjulendu quella lista di i suspesi, ùn ci era u nome d’Aron Boupendza. Tandu, semu, torna una volta, custretti di pensà, micca à qualchì culpacciu, ma, forse, di quelle pressione chì vi facenu passà i c….per zifulelli. Dopu à què, ci puderemu dumandà induve sò e cumpetenze di a ghjente chì gestisce u ghjocu à ballò francese. « Selon que vous soyez puissants ou misérables » dicia l’altru. Dopu à una pressione nantu à l’affare ACA-Le Havre è sopratuttu una pressione « pulitica », si pudaria pensà listessa cosa…Ma hè vera ch’è no semu sempre e « vittime »…
