L’Aiaccini anu fermatu, dopu à duie scunfitte è duie parità, a so prima vittoria di a stagione in casa soia vennari di fronte à Valenciennes. Forse, un altru avvene, avà, pè a squadra bianc’è rossa.
Ùn l’aspettavamu più ma,
in fine, è dopu à quattru scontri è solu dui punti in Timizolu (Lorient è Parrighji), sta prima vittoria di l’ACA in casa soia hè ghjunta vennari scorsu. Masimu di front’à una squadra abbastanza difficiule à ghjucà, quella di Valenciennes. Eppuru, u scenariu hè statu duru pè una squadra bianca è rossa carca di dubbiti, aspettendu, à tempu, di marcà dapoi cinque scontri. Un primu tempu abbastanza paru cù pochi occasione. Eppo, un ballò persu da Nouri in mezu terrenu chì permette à Dos Santos di lancià à Nestor in prufundezza pè l’apertura di a marca (24e). L’Aiaccini ùn anu micca da dubbità assai. U tempu, qualchì minutu dopu, pè Coutadeur di dà un ballò magnificu à Nouri, chì retablisce a parità d’un stucciu ind’è l’angulu drittu (34e).
S’è u primu tempu hè statu paru, pè u secondu, l’orsi anu cacciatu e scane. Tandu, ùn era più listessa squadra. Valenciennes serà custrettu di suppurtà l’assalti aiaccini. E cù u stintu ch’è noi li cunnisciamu l’annu scorsu, i partenarii di Cavalli anu supranatu i so avversarii durante 45 minuti. Occasione à pacchetti è à rombu di rinculà è sgagià ballò à a strappera, i Nordisti anu cappitulatu duie volte. A prima dopu à un calciu d’angulu di Nouri ripigliatu da Choplin cù l’aiutu di Gimbert (54e) è a seconda dopu à u ballò cacciatu male da a difesa è un bellu stucciu di Nouri à l’entrata di u spaziu di penalità. L’affare pudia esse ancu più dura per l’omi di Réginald Ray cù, forse un pénalty sminticatu nantu à Tramoni, un stucciu di stu ghjuvanottu da sopra a cabbia o una sfida persa duie volte da Mendes davant’à u purtieru avversu.
In fine, una cumunione trà i bianc’è rossi è i u so sustenitori. A prima di a stagione in Timizolu. Ci ne serà, forse, d’altre…
